Detaje të reja janë zbuluar në lidhje me arrestimin në flagrancë të një efektivi të forcave RENEA, i cili u ndalua duke transportuar 1 kg kokainë.
Burime bëjnë me dije se efektivi Xhuljo Liçi, prej disa javësh po mbahej nën vëzhgim nga Shërbimi për Çështjet e Brendshme dhe Ankesat në Policinë e Shtetit, në bazë të informacioneve të ardhura se ai merrej me trafikimin e kokainës.
Kolegët e tij pritën momentin që Liçi të arrestohej në flagrancë me lëndën narkotike, gjë e cila ndodhi pasditen e sotme.
Mësohet se Policia po kontrollon telefonat dhe banesat e të arrestuarve, për të zbuluar më tepër mbi rrjetin e shpërndarjes së kokainës në kryeqytet.
Në njoftimin publik bëhet me dije se efektivi u ndalua në rrugën e vjetër Tiranë-Durrës në zonën e Ndroqit, së bashku me shtetasit Ded Nimani 62-vjeç dhe Luan Gaçi 43-vjeç.
Në bazë të informacioneve të grumbulluara në rrugë operative nga ShÇBA, kishte dyshime të arsyeshme se efektivi i RENEA-s ishte pjesë e një grupi të trafikut të drogës, ndaj dhe u bë mbikqyrja e tij për një kohë të gjatë, për ta kapur në flagrancë.
Në cilësinë e provës materiale u sekeustrua lënda narkotike me peshë totale 1 kilogramë e 88 gramë, dy automjete, pesë aparate celular dhe një armë zjarri pistoletë me municion luftarak.
Njoftimi i plotë i policisë: Tiranë
Finalizohet operacioni policor antidrogë i koduar “BARON”
Operacioni nga Seksioni për Hetimin e Narkotikëve në DVP Tiranë.
Sekuestrohet 1 kilogramnë e 88 gramë lëndë narkotike Kokainë.
Vihen në pranga tre persona.
Në vijim të goditjeve të njëpasnjëshme kundër veprimtarisë kriminale në fushën e narkotikeve Specialistët e Seksionit për Hetimin e narkotikëve në DVP Tiranë , bazuar dhe në informacionet e marra në rrugë operative kanë organizuar dhe finalizuar operacionin policor të koduar “BARON”, në kuadër të të cilit u kapën dhe u vunë në pranga shtetasit:
L.G, 43 vjeç, banues në Vorë, XH.L, 28 vjeç (punonjës policie) banues në Fier dhe D.N, 62 vjeç, banues në Tiranë, me precedent të mëparshëm penal në fushën e narkotikëve.
Mbi bazën e informacioneve të marra nga Specialistët e Seksionit për Hetimin e Narkotikëve në DVP Tiranë se shtetasit D.M dhe L.G, në bashkëpunim me njëri-tjetrin merreshin me veprimtari kriminale në fushën e narkotikëve konkretisht duke blerë kokainë në sasi 1 deri në 2 kilogramë, dhe më pas duke e shitur atë në zona të ndryshme të Tiranës ,si dhe në kufi me qarkun e Durrësit me qëllim shmangien e prezencës policore, kanë organizuar punën duke i mbajtur nën vëzhgim.
Në aksin rrugor Tiranë -Durrës, rruga e vjetër në zonën e Ndroqit , shtetasi XH.L dhe D.N, janë kapur në flagrancë së bashku me shtetasin L.G, me një pako lëndë narkotike Kokainë.
Në cilësinë e provës materiale u sekeustrua lënda narkotike me peshë totale 1 kilogramë e 88 gramë, dy automjete, pesë aparate celular dhe një armë zjarri pistoletë me municion luftarak.
Nën drejtimin e Prokurorisë vijon puna për identifikimin dhe kapjen e personave të tjerë të përfshirë në këtë veprimtari kriminale.
Materialet i kaluan Prokurorisë së rrethit Gjyqësor Tiranë për veprime të mëtejshme për veprën penale “Prodhim dhe shitja e narkotikëve” e kryer në bashkëpunim.
