Sabire Metaj, mamaja e autorit të vrasjes së 23-vjeçares Sabrina Bengaj në Zhupan të Fierit, thotë se djali i saj e donte ish-gruan e madje fliste vazhdimisht në telefon me të pas daljes nga burgu, pikërisht për pengmarrjen e saj një vit më parë.
E tronditur nga ngjarja, Metaj thotë se të renë e kishte si vajzën e saj, pasi me djalin, Elton Metajn, ishte lidhur që 13-vjeçe.
Sabire Metaj thotë se i biri nuk kishte dhënë shenja se do të kryente një krim të tillë, ndërsa kërkon që të kapet nga policia dhe personi që i ka dhënë armën, pasi sipas saj ata nuk kanë pasur një të tillë në banesë.
E pyetur nëse do të kërkojë dënim maksimal për djalin e saj Sabire Metaj nguron që të pohojë një deklaratë të tillë, dhe thotë se drejtësinë e ka lënë në dorë të shtetit.
Flet mamaja e Elton Metajt:
Më ka bërë hatanë, unë nuk kam 40 ditë që varrosa babanë dhe vëllanë, nuk kuptohej fare që do ta bënte një gjë të tillë. Mbaroi dënimin dhe doli nga burgu. Ore ata duheshin, nuk e prisja që të ndodhte kjo, më vjen shumë keq se e rrita vetë edhe Sabrinën, mua më iku edhe djali bashkë me atë.
Është e njëjtë dhimbja edhe për mua, Sabrinën e kemi marrë 13 vjeçe, e ka shteti në dorë dënimin. Çfarë shenjash, nuk kemi kuptuar gjë, ata flisnin me njëri tjetrin akoma, nuk di që të kenë pasur konflikte. Ishin takuar pasi djali doli nga burgu, se i nxori vajzën që ta takonte.
Për çfarë e dua më jetën unë? Më vjen shumë keq, vrasjen e morëm vesh nga policia, na erdhën në shtëpi dhe na thanë. Pas ngjarjes djali telefonoi vetë policinë, mori edhe të atin dhe i tha se donte që të vetëvritej. Këtu në këtë derë nuk ka gjetur armë, ta gjejnë se kush ia ka dhënë armën. Armët sheshit janë se ku e ka blerë nuk e di, të shkojë në burg dhe personi që ia ka dhënë. Ai e donte me kokë të shoqen, flisnin dhe në telefon.
23-vjeçarja Sabrina Bengaj është e reja që u vra mbrëmjen e djeshme në pragun e shtëpisë ku ishte lindur e rritur, teksa po konsumonte darkën, e lodhur nga një ditë e gjatë pune. Personi që e qëlloi ishte ish-bashkëshorti i saj Elton Metaj, me të cilin kishte dhe një vajzë të mitur, të cilin e arrestoi disa orë më pas policia e Fierit.
Ky krim i rëndë do të shmangej në rast se prokuroria dhe gjykatat në vendin tonë, së bashku me policinë do të funksiononin, dhe Metaj nuk do të ishte lënë i lirë më pak se një vit nga pengmarrja që i bëri ish-gruas dhe familjes së saj. Ishte shtatori i 2020-tës, koha kur Metaj shkoi në banesën e prindërve të Sabrinës, dhe i mbajti ata peng për 5 orë nën kërcënimin e armës.
Pavarësisht arrestimit, ai qëndroi pas hekurave më pak se një vit, dhe u rikthye në të njëjtën banesë, tashmë duke i marrë jetën nënës së vajzës së tij të mitur.
Fax News mëson se ka qenë prokurori Çlirim Sino ai që i kishte kërkuar Gjykatës që Metaj të çohej në spitalin e burgut të Zaharisë për shkak se sipas tij ishte i sëmurë mendor, fakt që kundërshtohet nga persona të tjerë brenda institucionit të drejtësisë.
Pavarësisht rrezikshmërisë që paraqiste, Metaj u lirua nga burgu i Zaharisë me pretendimin se do të kurohej në kushte shtëpie. Pavarësisht se sipas ekspertëve Metaj nuk vuante nga probleme të shëndetit mendor, në mënyrë të dyshimtë ai u lirua, dhe që prej Korrikut duket se planifikonte vrasjen e ish-bashkëshortes, dhe kërcënonte edhe familjen e saj.
Akuzat mbi gjyqtarët dhe prokurorët i konfirmoi i tronditur pas ngjarjes dhe vëllai i Sabrinës, i cili tha se pas lirimit Metaj kishte kërkuar që të vriste dhe vetë atë. Siç është zakon në ngjarje të tilla, reagimet për Sabrinën do të përfundojnë brenda ditëve, por ajo që mbetet është fakti se 23-vjeçarja nuk është vetëm viktimë e armës së shtënë nga ish-bashkëshorti i saj, por edhe institucioneve që mbyllin sytë përpara fakteve ulëritëse.
ARRESTIMI I AUTORIT
Policia e Fierit ka arrestuar pas 3 orësh ndjekje 31-vjeçarin Elton Metaj i cili vrau mbrëmjen e djeshme në pragun e shtëpisë së prindërve të saj, ish-bashkëshorten e tij, 23-vjeçaren Sabrina Bengaj. Policia deklaron se për kapjen e tij janë kryer 3 orë ndjekje në një zonë të pyllëzuar, dhe në momentin e arrestimit, Metajt i është gjetur dhe arma e krimit, dhe mjeti me të cilin ishte larguar nga vendi i ngjarjes.
Krimi i rëndë i ndodhur dje në fshatin Zhupaj është kronika e një ngjarje të paralajmëruar, pasi Metaj dhe më herët kishte marrë peng të renë, dhe kishte kërcënuar me armë familjen e saj. Në vitin 2020 , Metaj e mbajti peng për më shumë se 5 orë bashkëshorten dhe familjen e saj në shtepinë e babait të kësaj të fundit dhe u desh nderhyrja e RENEA-s dhe FNSH-së për t’i liruar.
Më herët, në 22 shtator 2020, 31 vjecari nga Peshtan Bregasi, Elton Metaj u paraqit ne gjykaten e Fierit me akuzat “Armëmbajtja pa leje” , “Kundërshtim i punonjësit të policisë” dhe “Dhunë në familje”. Gjithsesi, ai ishte liruar nga qelia, me pretendimin se kishte çrregullime mendore, kanë konfirmuar burimet për Fax News.
Në rrëfimin pas ngjarjes mbrëmjen e djeshme, vëllai i viktimës tha se Eltoni kishte shkuar në banesën e tyre dhe e kishte qëlluar të motrën në pragun e shtëpisë. Ai hodhi akuza mbi shtetin dhe gjykatat për lirimin e tij, ndërkohë që tronditja është e madhe. (Lexo edhe ketu lajmin)
Eltoni dhe Sabrina janë prindër të një vajze të mitur, që sipas familjarëve të viktimës nuk ishte ndaluar që të takonte të atin e saj, pavarësisht dhunës dhe problemeve që ai kishte shfaqur.
(E.K/Faxweb.al)
