Gjykata e Posaçme e Apelit ka vendosur rihapjen e hetimeve për cështjen Gërdeci, duke pranuar kështu kërkesën e SPAK, për rinisjen e procesit hetimor për Fatmir Mediun, asokohe ministër i mbrojtjes.
Në ndryshim nga GJKKO, Apeli i Posaçëm ka vendosur që hetimet të hapen, dhe tashmë mbetet për t’u parë sesi do të veprohet me imunitetin e Fatmir Mediut, i zgjedhur deputet në zgjedhjet e 25 Prillit.
Vendimi për Mediun është marrë në dhomën e Këshillimit, ndërkohë që rihapja e hetimeve u kërkua nga familjarët e viktimave. Si pasojë e shpërthimit të municioneve në fabrikën e demontimit të armëve në Gërdec, ngjarje e ndodhur kjo në vitin 2008, humbën jetën 28 persona, mes tyre dhe fëmijë të mitur.
Njoftimi i Apelit të GJKKO-së:
Me referimin në parashikimin e pikës 1, shkronja b), të nenit 46, të ligjit 98/2016 “Për Organizimin e Pushtetit Gjyqësor në Republikën e Shqipërisë” si dhe, në interesin e treguar nga media, komunikohet në mënyrë të përmbledhur se, sot më datë 24.09.2021, në Gjykatën e Posaçme të Apelit për Korrupsionin dhe Krimin e Organizuar, mbi ankimin e Prokurorit të Posaçëm dhe të trashëgimtarëve të viktimës E.D., u zhvillua seanca gjyqësore në dhomë këshillimi, për çështjen penale nr. 212 akti, datë 03.09.2021 regjistrimi, ku Gjykata vendosi, të ndryshojë vendimin nr. 60, datë 27.07.2021 të Gjykatës së Posaçme të Shkallës së Parë për Korrupsionin dhe Krimin e Organizuar, duke pranuar kërkesën e Prokurorit të Posaçëm dhe revokoi vendimin e pushimit nr. 6, datë 14.09.2009 të Kolegjit Penal të Gjykatës së Lartë, duke i kthyer aktet Prokurorit të Posaçëm për të proceduar.
(E.K/Faxweb.al)
Discussion about this post