Studimet kanë zbuluar se shumica e njerëzve e kanë të vështirë të flenë gjatë udhëtimit dhe shkencëtarët thonë se të mos flesh gjumë kur je diku jashtë rutinës është në fakt një përgjigje normale e trurit.
Normale ose jo, të qenit i lodhur mund t’i ndikojë me të vërtetë pushimet. Kur nuk bëni një gjumë të mirë të natës, zgjoheni me humor të keq.
Por, ka diçka që fshihet pas fenomenit të gjumit të dobët gjatë udhëtimit:
“Efekti i natës së parë”
Shkencëtarët zbuluan fillimisht atë që ata e quajnë “efekti i natës së parë” gjatë studimeve të gjumit dhe vëzhguan se shumica e pjesëmarrësve kishin probleme me gjumin natën e parë. Subjekteve jo vetëm që iu desh më shumë kohë për të rënë në gjumë, por ata kishin vështirësi të qëndronin në gjumë. Pse? “Truri ynë e di se ky nuk është vendi ynë normal, kështu që ndoshta ka pak vetëdije të rritur”, tha Daniel L. Rifkin.
Kur ne hyjmë në një gjendje të pambrojtur (gjumë) në një vend të panjohur, truri ynë në mënyrë të pandërgjegjshme është në kërkim të kërcënimeve të mundshme. Kjo është arsyeja pse gjëra të tilla si zhurma më e dobët ose drita më e vogël mund t’ju mbajnë zgjuar në një dhomë hoteli. Truri juaj në fakt po përpiqet t’ju bëjë një nder duke ju mbajtur zgjuar, në rast se ka ndonjë rrezik.
Si të flemë më mirë gjatë udhëtimit
Pra, si t’i kapërcejmë këto instinkte jo shumë të dobishme kur jemi në udhëtim dhe të sigurohemi që të pushojmë për planet argëtuese që kemi të nesërmen? Rifkin rekomandon që njerëzit t’i përmbahen rutinave të tyre para gjumit për të fjetur më mirë gjatë udhëtimit, veçanërisht atë natën e parë. Sado joshëse që mund të jetë të qëndroni zgjuar duke folur me të dashurit që nuk i keni parë për një kohë, përpiquni të shkoni në shtrat në orën tuaj të zakonshme (ose më herët) në mënyrë që trupi juaj të kuptojë se është koha për të fjetur.
Ju gjithashtu mund të sillni disa sende nga shtëpia që mund ta mashtrojnë trurin tuaj për të menduar se është i sigurt. Një vaj esencial i preferuar, jastëku juaj i preferuar ose çdo aksesor (si maska për sytë) që përdorni gjatë natës mund t’ju ndihmojë të ndiheni më të qetë. Rifkin rekomandon gjithashtu marrjen e disa frymëmarrjeve të thella dhe vizualizimin e dhomës së gjumit në shtëpi kur përpiqeni të bini në gjumë.
