Presidenti Ilir Meta ka marrë pjesë në Forumin Global të Bakusë ku ka folur lidhur me gjendjen e vështirë ekonomike që ka kapluar të gjithë botën.
Meta tha se problemi numër një ishin çmimet e larta të ushqimeve dhe se qindra miliona njerëz pu vuanin nga mos-ushqyerja. Ndër të tjera presidenti shqiptar bëri thirrje ndaj liderve globalë që të ndërhynin për të stabilizuar gjendjen.
Postimi i Plotë nga presidenti, Ilir Meta:
Pasojat e luftës në Ukrainë kanë shkaktuar efekte valëzuese në mbarë globin në furnizimin me ushqime, sepse Ukraina dhe Rusia përbëjnë dy nga ‘shportat e bukës’ që furnizojnë botën me 30% të grurit dhe 20% të misrit.
Ndaj dhe në Forumin IX Global të Bakusë nënvizova se për momentin, çmimi i ushqimit është problemi numër një.
Deri në vitin 2023 do të përballemi vërtet me një problem të disponueshmërisë së ushqimit, duke pasur parasysh se rreth 300 milionë njerëz në mbarë botën janë tashmë të pasigurtë përsa i përket ushqyerjes, sipas Programit të Ushqimit Botëror.
Të gjitha portet e Detit të Zi duhet të hapen dhe funksionojnë, përndryshe do të gjendemi me një shpallje lufte ndaj sigurisë globale të ushqimit dhe kjo do të prodhonte uri, destabilizim dhe migrim masiv kudo.
Qindra miliona njerëz në mbarë botën varen nga ushqimi që vjen përmes këtyre porteve.
Udhëheqësit e botës duhet të bëjnë çdo gjë të mundshme për t’i sjellë tregjet në stabilitet përpara se gjërat të përkeqësohen, sepse, në terma afatgjatë, çmimet globale të ushqimeve do të rriten edhe më shumë si rezultat i rolit të Rusisë si prodhuesi kryesor i plehrave të nevojshme për të korrat.