Policia në Slloveni ka goditur dy banda kriminale të lidhura me rrjetin ndërkombëtar të drogës që drejtohej nga shqiptari Ergys Dashi, i ekzekutuar në janar të vitit 2022 në Ekuador të Amerikës së Jugut.
Mediat vendase bëjnë me dije se hetimet që çuan në goditjen e dy organizatave që trafikonin sasi të mëdha droge nga Amerika e Jugut drejt vendeve evropiane, u kryen nga prokurorë sllovenë dhe italianë, si dhe prokurorë nga Rrjeti Gjyqësor Evropian.
Policia e Koperit ka arrestuar së fundmi njëmbëdhjetë të dyshuar dhe ka sekuestruar disa kilogramë kokainë dhe kanabis dhe mbi 60,000 euro.
“Hetuesit mblodhën prova për një rrjet droge i drejtuar nga një shtetas shqiptar në Evropë po kontrabandonte sasi të mëdha kokaine nga Amerika e Jugut drejt vendeve evropiane. Kreu i grupit u vra në një restorant në Amerikën e Jugut në fillim të vitit 2022”, shkruajnë mediat sllovene, pa përmendur emrin e Ergys Dashit i cili mbeti i vrarë në Ekuador.
Sipas hetimeve, në Slloveni, kreu i grupit, pra Ergys Dashi ishte ndihmuar nga një tjetër shqiptar që ndodhet në burg dhe partnerja e tij nga zona e Izolës.
Ajo ishte përgjegjëse për mbështetjen logjistike dhe prokurimin e automjeteve me targa sllovene.
Automjetet modifikoheshin nga një organizatë kriminale në Holandë për të siguruar ndarje sekrete për të fshehur sasitë e drogës.
Discussion about this post