Përforcimi i parë për sezonin e ri, gati për të nisur javën e ardhshme. Juventusi tashmë ka mundur të sigurojë kthimin e Paul Pogba në Torino pas gjashtë vitesh me “Djajtë e Kuq”.
Massimiliano Allegri mund “të fërkojë duart” pasi, mbas një negociate shumë të gjatë, anësori i shumëpritur, që i përgjigjet emrit të Angel Di Maria, po i afrohet me hapa të mëdhenj fanellës bardhezi.
Situata me argjentinasin ishte pothuajse si një telenovelë e vërtetë. Diskutimet mes Angel Di Marias dhe Juventusit kanë nisur prej disa muajsh. Disa oferta në “pjatë”, negociata për kohëzgjatjen e kontratës, hapa përpara, hapa mbrapa dhe ndjenja që alternonin vazhdimisht optimizmin dhe pesimizmin.
Megjithatë, tani, pak ditë para fillimit të përgatitjeve për sezonin e ri, “Fideo” i ka shuajtur rezervat mbi një transferim të tillë. Pas shtatë vitesh me Paris Saint-Germain, argjentinasi do të transferohet në Torino për ta mbyllur aty karrierën evropiane si futbollist.
Tani ka nisur numërimi mbrapsht për mbërritjen e tij në Torino. Pastaj do të shohim si do të shkojë viti i tij bardhezi. Ai pritet të vihet në dispozicion të Massimiliano Allegrit, i cili pas një hezitimi fillestar e ka vendosur Di Marian në krye të listës së dëshirave për repartin ofensiv.
Kështu, Juventusi doli kundër të gjitha kërkesave të anësorit të lindur më 1988: një vit i vetëm kontratë për një shifër prej rreth 7 milionë euro. Asnjë bienale, asnjë Dekret për Rritje. Për sa i përket kohëzgjatjes së marrëdhënies, “Fideo” ishte i qartë menjëherë: një vit të fundit në Evropë për t’u përgatitur më mirë për Botërorin e fundit me Argjentinën.
Pastaj rikthimi në “fole”, ku e pret klubi i tij i preferuar, Rosario Central, që tashmë ka trajner Carlos Tevez. Por ajo që ka më shumë rëndësi është se për momentin, Di Maria ka zgjedhur Juventusin.
