“Shiko ku jam!”, “kur do kthehesh?”/ Pyetja që nuk mori përgjigje nga Filippo, bilanci tragjik në Itali: 6 alpinistë të vdekur, 20 të zhdukur

Një bilanc tragjik është ai i shembjes së një masivi akulli në malin e Marmoladas, në Dolomite, në Itali.

Deri tani janë nxjerrë të vdekur 6 persona, 10 të tjerë janë plagosur, ndërkohë që ende rezultojnë të zhdukur 20 alpinistë.

Për momentin mediat vendase bëjnë me dije se janë 6 viktima të konfirmuara: tre italianë, një çekosllovake, si dhe një burrë dhe një grua ende të paidentifikuar.

Siç raporton La Stampa, mes viktimave të konfirmuara do të ishte edhe 27-vjeçari nga provinca e Vicenza-s, Filippo Bari, i cili i kishte dërguar një selfie familjes para tragjedisë.

“Shiko ku jam”, kishte shkruar Filippo duke shoqëruar foton dërguar grupit të familjarëve. “Kur do të kthehesh?”, e pyetën ata, por 27-vjeçari nuk u përgjigj kurrë. Filippo nuk ishte një alpinist fillestar dhe ata që e njohin e cilësojnë si “me mjaft përvojë”. Megjithatë, kjo përvojë nuk ishte e mjaftueshme përballë forcës së dhunshme të natyrës.

Ndërkohë, “po vijojnë kontrollet për identifikimin e pronarëve të 16 makinave që ndodhen aktualisht në parkingjet që ndodhen pranë shtigjeve të hyrjes në zonë”. Kjo u komunikua nga Alpine Rescue of Trentino, e cila po koordinon kërkimin e personave të zhdukur në murin Marmolada.

Dëshmitarët bëjnë me dije se dëgjuan një zhurmë të fuqishme në fillim, e cila u pasua nga rrëshqitja me shpejtësi e masivit të akullit, që nuk iu la kohë shumë personave të largoheshin.

Situata është ende e rrezikshme, pasi ekziston mundësia që nga mali më i lartë i Dolomiteve të shkëputen dhe sasi të tjera akulli.

(E.K/Faxweb.al)