Deputetet e PD-së ‘presin’ kolegët socialistë nga fotot, thonë se patën takim të veçantë me Escobar në SHBA

Prej disa ditësh një grup deputetësh nga Kuvendi i Shqipërisë ndodhen në Uashington, ku kanë zhvilluar takime me përfaqësues të ndryshëm të politikës atje. Nga PD janë dërguar Orjola Pampuri dhe Jorida Tabaku, ndërkohë që socialistët përfaqësohen po ashtu nga dy zonja, Anila Denaj dhe Etilda Gjonaj, si dhe Blendi Klosi.

Ajo që bie në sy nga fotot që postojnë deputetët në rrjetet sociale, është kompleksi i demokrateve për të nxjerrë edhe kolegët e tyre socialistë. Së fundi ka qenë deputetja Pampuri ajo që ka postuar një takim me Gabriel Escobar, të cilin pretendon se e ka zhvilluar edhe në shoqërinë e Jorida Tabakut, kur në fakt në anën tjetër të tavolinës kanë qenë edhe socialistët.

Pampuri thotë se nga Escobar ka marrë mbështetje për një PD më të fortë, ndërkohë që duket e dyshimtë që përfaqësuesi i SHBA të ketë pasur një qëndrim kaq politik, në një takim me deputetë të Kuvendit shqiptar.

”Sot, bashkë me znj. Tabaku, kishim kënaqësinë e veçantë, të kishim një takim të shkëlqyer me Z.Gabriel Escobar, i cili shprehu mbështetjen e tij për Partinë Demokratike. Mirënjohëse për mbështetjen e aleatit tonë strategjik SHBA, dhe të vendosur për të vijuar më tej. 100 vite marrdhënie diplomatike, mbështetje dhe mirënjohje. Krah për Krah”, shkruan Pampuri në postimin e saj në rrjete sociale.

Nga ana tjetër fotot e takimit i kanë shpërndarë edhe socialistët, të cilët në ndryshim nga Pampuri e kanë dhenë foton e plotë të tavolinës. Ish-ministrja Gjonaj shkruan se Escobar ka shprehur mbështetjen e qeverisë për mbajtjen në një kohë sa më të shpejtë të konferencës ndërqeveritare.

Postimi i Gjonajt: 

Në kuadër të vizitës zyrtare në Washington D.C u mirëpritëm në Departamentin Amerikan të Shtetit nga z. Gabriel Escobar, Zëvendës Ndihmës Sekretar në Byronë e Çështjeve Evropiane dhe Euroaziatike.

Zhvilluam një diskutim të frytshëm për marrëdhëniet e shkëlqyera dypalëshe SHBA-AL, si dhe mbështetjen e plotë të SHBA-së për integrimin europian të Shqipërisë, shprehur publikisht sëfundmi edhe në deklaratën e Sekretarit Amerikan të Shtetit Antony Blinken.

Mirënjohës DASH për mbështetjen politike dhe asistencën teknike nëpermjet programit #OPDAT për reformën në drejtësi, në shërbim të forcimit të demokracisë dhe shtetit të së drejtës.

Escobar theksoi rëndësinë e rezultateve të reformave të ndërmarra në dhe siguroi mbështetjen e DASH për zbatimin në vijim të reformës në drejtësi.

Duke e cilësuar Shqipërinë një aleat strategjik i SHBA-së në rajon, z. Escobar u shpreh se Shqipëria meriton që konferenca e parë ndërqeveritare të mbahet sa më shpejt.

(E.K/Faxweb.al)