Robert Gajda komisioneri për Mbrojtjen nga Diskriminimi, është shprehur në lidhje me gjuhën e përdorur gjatë kësaj fushate. Gajda ka thënë për gazetaren Rugova Dunisha, se në krahasim me fushatën e vitit 2021, ka një përmirësim të gjuhës së përdorur.
Megjithatë, përpos rekomandimeve të bëra dhe pranimit të kodit të etikës nga disa subjekte, vazhdon ende të ketë diskriminim dhe denigrim në gjuhën e përdorur nga eksponentë të ndryshëm politikë.
Sa për posterat e vendosur nga subjektet politike, Gajda thotë se nuk është bërë ndonjë sinjalizim i mprehtë, përpos posterit të vendosur nga kandidati i “Bashkë Fitojmë” për Tiranën, për të cilin ka pasur një reagim nga persona të ndryshëm.
Robert Gajda: Ne jemi në monitorime të ndryshme lidhur me fushatën elektorale qoftë nga stafi i institucionit qoftë nga organizata partnere, por vëmë re përdorim të gjuhës që në të shumtën e rasteve nuk lidhet shumë me fushatën ose programe, fatkeqësisht përdoret gjuha dhe për të targetuar kundërshtarë të ndryshëm politikë, si për karakteristika të tyre personale ose terma të papërshtatshëm apo shkelje të etikës së një komunikimi normal.
Kjo fushatë futet në këto konture, po në krahasim me fushatën e 2021, ka patur një gjuhë më denigruese edhe gjuhë seksiste. Në këtë rast ka një gjuhë të papërshtatshme, që në situata të ndryshme ngre shqetësime.
Duhet të flasim për çdo manifestim që përdoret, kryesisht posteri me ngritjen e gishtave ka pasur një shqetësim edhe nga organizata të ndryshme, por edhe qytetarë. Kemi bërë thirrje që të tregohen të kujdesshëm. Shqetësimi më i madh është lidhur me mesazhin potencial që mund t’u dërgohet fëmijëve, që nuk është etik. Përgjithësisht, në vendosjen e posterave nuk na janë sinjalizuar shqetësime të mprehta në lidhje me mesazhet. Më shumë shihen nëse kanë mesazhe të natyrës seksiste, raciste, ose fetare.
Së pari ajo që është vënë re është se të gjitha subjektet politike përdorin gjuhë diskriminuese të ngjyrave të ndryshme. Në 2021 është monitoruar me kujdes përdorimi i gjuhës, është adresuar duke dalë me deklarata të përgjithshme për shmangien e kësaj gjuhe. Përdorimi i gjuhës diskriminuese është shqetësim evropian, ka rekomandime specifike që ua kemi drejtuar subjekteve politike, prandaj kemi propozuar dhe një kod për etikën, që është pranuar nga disa parti, megjithatë eksponent të ndryshëm nuk i respektojnë këto kode.
Mbetemi në një fushatë elektorale që etikisht nuk është ende në nivelin e duhur.
Discussion about this post