Katër fëmijë dhe një i rritur u plagosën nga sulmi me thikë në Francë, Macron: Ndodhi në mes të ditës, është arrestuar autori

Katër fëmijë dhe një i rritur janë plagosur në një sulm me thikë në qytetin piktoresk Annecy në Alpet Franceze.

Të paktën tre nga viktimat janë në gjendje kritike në spital.

Rreth orës 9:45 të mëngjesit, një burrë i armatosur me thikë hyri në një kënd lojërash për fëmijë pranë liqenit të famshëm të qytetit dhe sulmoi një grup fëmijësh të moshës rreth tre vjeç teksa luanin, tha një burim sigurie dhe një zyrtar lokal për AFP.

Presidenti francez, Emmanuel Macron, shkroi në Twitter se ishte një akt “frikacake absolute” dhe kombi ishte në tronditje.

Një dëshmitar, i quajtur Nelly, tha për radion France Info: “Njerëzit vraponin, qanin, paniku … ishte e tmerrshme.”

Deputetja e Haute-Savoie Virginie Duby-Muller tha për BFMTV: “Jam e tmerruar… të sulmosh fëmijët është e neveritshme. Është e paimagjinueshme ajo që ndodhi sot në mëngjes këtu në një vend kaq të qetë dhe paqësor, një vend i dashur nga banorët dhe turistët. Jemi të tronditur.”

Policia kombëtare, në vend të hetuesve anti-terroristë, po drejton hetimin. Policia fillimisht tha se gjashtë fëmijë ishin plagosur.

Ministri i Brendshëm francez, Gérald Darmanin, shkroi në Twitter se i dyshuari “është arrestuar falë reagimit të shpejtë të forcave të sigurisë”.

“Disa njerëz, duke përfshirë fëmijë janë plagosur nga një individ i armatosur me thikë në një shesh në Annecy,” shkroi ai në Twitter.

France Info raportoi se burri ishte 32 vjeç, mbante letra identiteti siriane dhe ishte azilkërkues. BFMTV raportoi se burri kishte statusin e refugjatit.

Kryeministrja, Élisabeth Borne, po udhëtonte për në vendngjarje dhe deputetët në parlamentin kombëtar mbajtën një minutë heshtje pasi lajmi për sulmin u përhap në mediat franceze.