Në konferencën e përjavshme me gazetarët ish-kryeministri Sali Berisha foli për zhvillimet aktuale në Partinë Demokratike.
Berisha sqaroi se mbledhja me deputetët ditën e martë e thirrur nga Gazment Bardhi ishte për të koordinuar veprimet opozitare në parlament.
Berisha bëri edhe dallimin mes grupimit që ai drejton dhe Partisë Socialiste ku sipas tij nuk ka fare garë. Në PD thotë Berisha, sot ka garë reale.
Sali Berisha: “Unë kam sjellë në këtë parti garën, kam risjellë garën e vërtetë. Kushdo ka të drejtë të garojë në çdo post. Ka një ndryshim si dita me natën mes PD sot dhe PS, ku nuk votohet asnjë zyrtar, vetëm komunikohet. Nuk ndodhte as në PPSH. Pesha e Enver Hoxha ishte e padiskutueshme, por votimet në plenume apo byro bëheshin. Rama ka përjashtuar votën nga partia e tij.
Ky grup deputetëtsh bashkë me të tjerë do të kenë mundësinë të zgjedhin kryetarin e grupit të bashkuar parlamentar, i cili mund të jetë Gazment Bardhi apo cilido do votojnë deputetët. Ai takim siç e patë ju nuk u zhvillua me më the të thash. Por u zhvillua për çështje thelbësore të parlamentit, ku duhet të përqëndrohet opozita në betejën parlamentare. U prezantua reforma zgjedhore si objektivë kryesore, sepse Rama do ta bëjë me Ali-Bashën reformën zgjedhore. Reforma të jetë e vërtetë.”
Berisha gjithashtu iu përgjigj pyetjes nëse do ta pranonte që në mbledhjen e ardhshme të deputetëve të ishte edhe Lulzim Basha.
Sali Berisha: “Nuk e lë Balla të vijë (për Bashën), sepse Rama ka ngarkuar Ballën të merret fuqishëm me të, ” thotë Berisha.
Discussion about this post