I ftuar në lidhje Skype pasditen e sotme në Fax News ishte avokat Kujtim Cakrani. Në ditën e 111-vjetorit të Shpalljes së Pavarësisë, Cakrani tregoi për gazetaren Rovena Neziri disa histori të asaj kohe që lidhen përveçse me Shpalljen e Pavarësisë, edhe me familjen e tij. Një prej paraardhësve të tij Hajredin Bej Cakrani ka luajtur një rol kyç në Shpalljen e Pavarësisë.
Por sipas Cakranit pas 111 vjetëve shqiptarët nuk njohin asnjë prej 40 firmëtarëve, pasi nuk e respektojmë të kaluarën. Nëse nuk mësohet e kaluara nuk mund të ecim përpara.
Kujtim Cakrani: Pavarësia e Shqipërisë erdhi si pasojë e përpjekjeve të panumërta në kohëra ta patriotëve të Shqipërisë që kishin nisur këtë udhëtim që me Lidhjen e Prizrenit doja të thoja. Unë si pasaardhës i një familjeje që kanë qenë pjesëmarrëse në të gjitha ngjarjet historike që janë vendosur fatet e Shqipërisë, jo vetëm Festa e Pavarësisë por edhe Lidhja e Prizrenit. Jam i bindur që janë ngjarje shumë të rëndësishme ku shqiptarët duhet t’i mësojnë sepse pa mësuar këto nuk mund të ecim përpara. Një popull që nuk kujton të kaluarën dhe nuk respekton të kaluarën është i destinuar të shuhet. Shqiptarët nuk njohin asnjë prej 40 firmëtarëve.
Nga ana tjetër, paraardhësi i tij Hajredin Bej Cakrani shoqëroi Ismail Qemalin drejt Vlorës, që nga lumi Shkumbin. Por këtë e bëri me eskortën e tij, që ishte garda e asaj kohe dhe jo me karrocë siç e paraqet filmi.
Në atë kohë ishte baltë dhe kohë e keqe pasi lumenjtë kishin dalë nga shtrati. Hajredin Bej Cakrani së bashku me vëllain e tij Bektash Cakranin ishin me Ismail Qemalin.
Kujtim Cakrani: Për atë kohë kemi kujtimet e paraardhësit tim Hajredin Bej Cakranit, i cili ka qenë një nga aktorët kryesor të Shpalljes së Pavarësisë bashkë me Bektash Cakranin. Në kujtimet e Hajredin Bej Cakranit ai zbërthen me detaje të gjithë udhëtimin e Ismail Qemalit. Kishte një batalion ku ai doli përpara në Shkumbin Ismail Qemalit bashkë me delegacionin që kishte mbërritur nga Bukureshti dhe nga Trieste në Durrës. Dhe e mori nëpër baltrat dhe nëpër shiun e rrëmbyeshëm të asaj periudhe që nga data 20-28 nëntor ka qenë një kohë shumë e vështirë. Kishin dalë të gjithë lumenjtë. Kishte dalë lumi Shkumbin, lumi Seman, kishte dalë dhe lumi Vjosa. Tregon me detaje se si e ka marrë Ismail Qemalin në lumin Shkumbin. E ka gjetur atje me kuaj e me buaj, që ajo karroca e famshme që këta e kanë bërë në film është një gënjeshtër sepse nuk kishte asnjë lloj mundësie që ai të udhëtonte me karrocë veçse me kalë. E ka marrë Ismail Qemalin në çifligjet e tij në Libofshë. E ka mbajtur një natë ku e ka ndërruar, sepse i gjithë delegacioni ishte bërë ujë nga koha e vështirë që ishte. Ditën tjetër e ka çuar në Fier dhe nga Fieri në Vlorë bashkë me batalionin e tij që mund të themi pa frikë ishte Garda e Parë e Republikës.
Discussion about this post