Lulzim Basha: Mbështetje pa kushte për SPAK

Kryetari i Partisë Demokratike Lulzim Basha ka folur pasditen e sotme nga Kuvendi zgjedhor i degës 11 të PD-së.

Ai theksoi se lufta personale brenda partisë ka sjellë kosto të madhe për shqiptarët dhe se nuk duhet të kthehemi në kohën kur Shqipëria nuk ka patur një opozitë.

“Lufta për interesa personale për dy vite brenda PD, ka ardhur me një faturë shumë të madhe për Shqipërinë dhe shqiptarët. Një pjesë prej nesh e ka përjetuar atë kohë kur Shqipëria nuk kishte opozitë. Ne nuk mund dhe nuk duhet të kthehemi në atë kohë. Tani që hetimet e SPAK po rrëzojnë njerilpas tjetrit, i janë turrur për ta sulmuar. Dhe kjo nuk është kohë për dilema, por për qëndrime të qarta: e mbështesim apo jo drejtësinë”, tha Basha.

Basha tha se PD është e qartë në qëndrimin e saj, duke mbështetur 100% SPAK-un dhe drejtësinë e re.

“Përballë kemi një kastë politikanësh që për 33 vite nuk kanë pyetur për ligjin. Ndaj, këta politikanë duhet t’i pyesim: Duhet apo nuk duhet ta mbështesim SPAK-un? Tani që drejtësia ka nisur të veprojë, duhet apo nuk duhet ta mbështesim SPAK-un. E kuptojmë Edi Ramën që është bërë pishman për drejtësinë e re. A nuk është kjo koha që opozita t’i qëndrojë në krah për të vënë para ligjit pandëshkueshmërinë. Si mund të jesh kundër drejtësisë, kur je kundër korrupsionit? PD e ka zgjidh këtë dilemë, 100% në mbështetje të SPAK-ut dhe drejtësisë. 100% mbështetje pa kushte për SPAK.”