Ceremonia Grammy/ Bebe Rexha suporton Dua Lipën: Jemi dy shoqe, të dyja shqiptare

Mbrëmjen e 4 shkurt u mbajt ceremonia e çmimeve “Grammy”, në Los Angeles.

Ceremonia e çmimeve u hap nga Dua Lipa, e cila dhuroi një performancë fantastike duke kënduar dy nga hitet e saj.

Këngëtarja ishte e nominuar për dy çmime, “Kënga më e mirë e vitit” dhe “Kënga më e mirë e kompozuar për mediat vizuele”, të dyjat për këngën e saj “Dance The Night” nga filmi “Barbie”.

Nga ana tjetër, Bebe Rexha ishte e nominuar për çmimin “Kënga më e mirë ritmike e zhanrit elektronik” për hitin e saj “One in a Million” në bashkëpunim me David Guetta.

Në një intervistë që Bebe dha gjatë ceremonisë, Bebe tregoi një përkrahje të madhe për Dua Lipën.

“Më duhet të bëj një thirrje për shoqen time Dua Lipa, sepse ju e dini që ne të dyja jemi shqiptare, kështu që unë duhet ta mbështes atë. Jam shumë e emocionuar për performancën e saj dhe e di që ajo do të shkëlqejë“, tha Bebe gjatë intervistës.