Basha uron Kosovën në 16-vjetorin e Pavarësisë: ‘Jam i lumtur për çdo ditë që i’a kam dedikuar çështjes së Kosovës’

Kreu i PD-së Lulzim Basha ka dhënë një mesazh urimi për 16-vjetorin e Pavarësisë së Kosovës. Basha shprehet se 17 shkurti i vitit 2008 është pa dyshim një nga ngjarjet më të rëndësishme që kurorëzoi sakrificat shekullore të gjysmë së kombit për liri dhe pavarësi.

Basha çmon në mesazhin e tij, figurat e komandatit legjendar të UÇK-së Adem Jashari, si dhe presidentin Ibrahim Rugova. Nga ana tjetër, ai shton se sot ka ende sfida për Kosovën, por që sipas tij ajo do t’ja dalë me sukses edhe me mbështetjen e SHBA, BE-së dhe Britanisë së Madhe.

Basha e mbyll duke treguar lumturinë që ndjen për çdo ditë që ia ka dedikuar çështjes së Kosovës dhe duke i qenë mirënjohës Zotit për këtë mundësi.

Mesazhi i kryetarit të PD, Lulzim Basha:

Gëzuar Pavarësinë Kosovë! 🇽🇰🇦🇱

17 shkurti i vitit 2008 është padyshim një nga ngjarjet më të rëndësishme për shqiptarët që kurorëzon sakrificën shekullore të gjysmës së kombit për liri dhe pavarësi.

Në këtë ditë të çmuar kujtojmë me nderim dhe mirënjohje të thellë kombëtare komandantin legjendar të UÇK Adem Jasharin, arkitektin e Pavarësisë presidentin Ibrahim Rugova dhe mijëra bij e bija të Kosovës që sakrifikuan jetën e tyre për në altarin e lirisë së Kosovës.

Jemi krenarë për zhvillimin dhe progresin që Kosova ka arritur në këto 16 vite. Ajo sot ka ende sfida përpara, por jam i bindur se me vendosmërinë, përkushtimin dhe pjekurinë e lidershipit politik të Kosovës në bashkëpunim dhe me mbështetjen e partnerëve strategjikë, SHBA 🇺🇸, BE 🇪🇺, Britanisë së Madhe 🇬🇧, do t’ia dalë me sukses për të ndërtuar një shtet të fortë, të zhvilluar dhe të integruar në institucionet ndërkombëtare dhe euroatlantike.

Kjo është një ditë shumë e veçantë edhe për mua personalisht dhe atë pjesë të familjes sime që si mijëra të tjera u dëbuan nga trojet e tyre. Jam i lumtur për çdo ditë që i’a kam dedikuar çështjes së Kosovës dhe falenderoj Zotin që ma ka dhënë mundësinë për ta bërë këtë edhe si një amanet i përcjellë brez pas brezi, sikundër sa të kem forcë dhe mundësi do të jem në krah të Kosovës për të ndihmuar në suksesin e saj.

Gëzuar Kosovë e shtrenjtë! Gëzuar shqiptarë kudo në botë!