Institucioni i Avokatit të Popullit ka reaguar për protestën e zhvilluar ditën e djeshme nga opozita në bulevardin përpara kryeministrisë. Në njoftim thuhet se protesta në përgjithësi kishte një klimë paqësore.
Por pas një monitorimi të kryer, rezultoi se policia shoqëroi në komisariate 11 persona, një prej të cilëve pretendon se është dhunuar nga policë civilë në momentin e ndalimit.
Avokati i Popullit thekson se e drejta për të protestuar i përket kujtdo dhe garantohet nga Kushtetuta.
Reagimi i Institucionit të Avokatit të Popullit:
Institucioni i Avokatit të Popullit ka monitoruar sot protestën e organizuar nga opozita në Tiranë.
Në terren përgjatë gjithë kësaj proteste kanë qenë 4 grupe monitoruese, e më tej pas përfundimit të protestës janë monitoruar të gjitha komisariatet e Tiranës.
Përsa më sipër Avokati i Popullit bën me dije sa më poshtë vijon:
Protesta është zhvilluar përgjithësisht në një klimë paqësore, përtej disa incidenteve të lokalizuara, gjatë ecurisë së saj.
Nga monitorimi i kryer në komisariate ka rezultuar se deri në orën 22:00 ka pasur 11 të shoqëruar, vetëm në Komisariatin nr.1, të gjithë persona madhorë, ndërsa në komisariatet e tjera nuk ka pasur të shoqëruar.
Mes të shoqëruarve, një nga këta shtetas pretendon se është dhunuar gjatë kësaj proteste nga policë civilë, në momentin e ndalimit.
Shtetasi A.M kishte shenja të dukshme lëndimi në fytyrë, enjtje dhe mavijosje në syrin e majtë dhe Avokati i Popullit i mori një ankesë e cila do të trajtohet në vijim.
Avokati i Popullit thekson se e drejta e protestës paqësore është një e drejtë thelbësore, e njohur dhe e garantuar nga Kushtetuta.
Discussion about this post