Dështoi mbledhja për shqyrtimin e kërkesës së tyre, Hoti dhe Vokshi: Nuk do të ketë jetë normale parlamentare

Pas dështimit të ‘Byrosë së Kuvendit’, Albana Vokshi dhe Elda Hoti, dolën në një konferencë të përbashkët për media.

Gjatë konferencës, Vokshi i bëri thirrje Ramës dhe Nikollës, bashkë me deputetët e mazhorancës që nuk do të ketë jetë normale parlamentare, duke deklaruar se do të jetë pjesëmarrëse në seancën plenare të së enjtes.

“Edhe e ndoqët mbledhjen e turpshme të Byrosë së Kuvendit mbas ankimimit që unë dhe kolegia Hoti bëmë për vendimin antikushtetues për përjashtimin për 10 ditë nga e gjithë veprimtaria parlamentare.

Shumë kolegë na thanë se nuk do arrini asgjë, por patë që mbledhja e stisur dështoi me sukses. U dhanë urdhër për të dështuar sepse nuk u bë kuorumi. Felaj tha se kaq mund të bëj për ju. Mirë që të dënojnë pa ndjekur asnjë procedurë, afat dhe në shkelje të neneve 64 dhe 65, por nuk të japin as mundësinë të kundërshtosh.

Një mesazh kam për Ramën dhe Nikollën dhe deputetët e mazhorancës, nuk do ia dilni dot. Edhe një deputet të mbetet në Kuvend, ju sigurojmë që nuk do të ketë jetë normale parlamentare. Vendimi është nul, nesër unë dhe kolegia do të jemi në seancë plenare”, tha Vokshi.