Grupi Parlamentar i Partisë Socialiste ka zhvilluar mëngjesin e sotëm mbledhjen e javës së fundit të këtij sesioni parlamentar. Seanca parlamentare do të shtrihet në dy ditë të enjten e të premten për shkak të numrit të lartë të akteve.
Kreu i Grupit, Bledi Çuçi informoi deputetët për çështjet dhe projektligjet që do të diskutohen, ku në rendin e ditës janë parashikuar gjithashtu dy interpelanca me ministrat Gonxhaj e Mete, raportet vjetore të disa institucioneve të pavarura, projektligjet “Për Policinë e Shtetit”; “Për rregullimin e prodhimit, tregtimit, kërkimit dhe zhvillimit të armëve, municioneve, pajisjeve dhe teknologjive ushtarake”, si dhe disa akte të tjera.
Në vijim të mbledhjes Çuçi iu tha deputetëve se propozimet e Grupit të Dialogut për Reformën Zgjedhore janë ende në fazë diskutimi në nivel politik dhe nëse do të ketë dakordësi atëhere këto propozime do t’i paraqiten seancës ditën e premte.
Gjithashtu pati diskutime për çështje të tjera komunitare të ngritura nga deputetët sipas zonave të tyre.
