Një person i armatosur me pistoletë hapi zjarr mbi një grup prej tre personash me kombësi shqiptare. Për pasojë bilanci ishte të paktën një i vrarë dhe 3 të plagosur, mes tyre djali dhe nipi i viktimës.
Ngjarja e rëndë ndodhi në lagjen Teisseire të Grenoble, të dielën e kaluar.
Viktimë nga agresioni i armatosur mbeti 47-vjeçari i identifikuar nga mediat shqiptare si Ylli Bezhani, i cili ka marrë 5 plumba në trup dhe nuk mundi t’i mbijetonte plagëve, edhe pse u dërgua në spital.
Mediat franceze raportuan detajet e para nga vendngjarja dhe hetimet policore, duke nënvizuar se i biri 24-vjeçar i viktimës dhe nipi 21 vjeç, së bashku me një person të tretë, mbetën të plagosur rëndë dhe po trajtohen në spitalin e qytetit.
Ngjarja ndodhi pak para orës 20:00, në një zonë të qetë të qytetit, rreth 100 metra larg nga kryqëzimi me Avenue Paul-Cocat. Autori i sulmit mbetet ende i paidentifikuar, ashtu sikurse edhe motivet e ngjarjes së rëndë. Besohet se mes dy grupeve ka pasur përplasje, por po verifikohen të gjitha pistat e mundshme, përfshi edhe ato që kanë të bëjnë me bizneset ilegale.
“Ishte një burrë i cili ishte duke hipur në një skuter elektrik që hapi zjarr. I pajisur me një pistoletë, ai zbrazi karikatorin e tij mbi një grup prej tre personash. Më pas ai u largua drejtpërdrejt dhe policia ende nuk ka gjetur gjurmët e tij”, shkruan portali “francebleu.fr”.
Deri tani të paktën 3 persona janë arrestuar, që në fakt ishin shënjestrat e sulmit. Policia franceze sqaroi se ata u ndaluan për të sqaruar rrethanat apo “një pritë e mundshme”, sipas prokurorit publik të Grenoble. Prokurori publik i Grenoble, Eric Vaillant, njoftoi se një hetim ishte hapur për “atentat” dhe “tentativë për atentat”.
Discussion about this post