Nga Ksamili në Koman 17 mjete lundruese të bllokuara gjatë kësaj jave

Policia Kufitare dhe Njësia Policore Detare bëjnë me dije se gjatë javës së parë të shtatorit, në kuadër të operacionit “Siguria Detare” ka bllokuar 17 mjete lundruese.

Operacioni është zhvilluar nga Ksamili në Koman përgjatë gjithë vijës bregdetare, hapësirave liqenore dhe atyre lumore.

Mjetet e bllokuara janë: 9 jet ski, 4 skafe, 3 gomone dhe 1 varkë metalike.

10 mjete lundruese janë bllokuar nga Ksamili në Vlorë.

5 mjete lundruese janë bllokuar nga Durrësi në Shëngjin.

1 mjet lundrues është bllokuar në Velipojë dhe 1 varkë metalike me motor uji për lundrim është bllokuar në Koman.

5 prej mjeteve lundruese të bllokuara janë konstatuar nga uniformat blu duke lundruar brenda perimetrit të sigurisë, shkelje e cila rrezikonte jetën e pushuesve. Drejtuesit e këtyre mjeteve janë ndëshkuar secili me masë administrative prej 100,000 lekësh të rinj.

Ndërsa drejtuesit e 12 mjeteve të tjera lundruese, krahas masës së bllokimit të mjeteve, u ndëshkuan secili me masë administrative prej 10,000 lekësh për mungesë dokumentacioni.

Po gjatë kësaj jave, Njësia Policore Detare dhe Policia Kufitare iu kanë dhënë ndihmë turistëve dhe vizitorëve në 11 raste në hapësirën detare nga Ksamili në Koman. Në shumicën e rasteve, turistëve ju rrezikohej seriozisht jeta për shkak të prishjes së mjeteve lundruese apo pamundësisë për t’u kthyer në breg për shkak të dallgëve.