Shefi i Organizatës Botërore të Shëndetësisë (OBSH) kërkoi një armëpushim të menjëhershëm pas sulmeve ajrore vdekjeprurëse izraelite në një “zonë të sigurt” të caktuar për të zhvendosurit në Gazën jugore.
Në X, Tedros Adhanom Ghebreyesus dënoi sulmin e ushtrisë izraelite ndaj tendave që strehonin civilë të zhvendosur në Khan Younis, vende “që supozohet se janë të sigurta”.
“Sulmet vdekjeprurëse ajrore në Khan Younis demonstrojnë edhe një herë nevojën urgjente për një armëpushim,” tha Tedros. Të paktën 40 persona u vranë dhe dhjetëra u plagosën të martën. Shërbimi i mbrojtjes civile të Gazës tha se raketat izraelite u vunë flakën tendave të refugjatëve.
“Asnjë vaksinë apo ilaç nuk mund të ndihmojë nëse njerëzit vriten dhe detyrohen të jetojnë në kushte kaq të rënda,” tha Tedros.
Ai tha se fushata e vaksinimit të poliomielitit në Gazën veriore, e nisur të martën, pritet të vazhdojë deri më 12 shtator. Ai konfirmoi se vaksinat u dorëzuan në zonë. “Ekipi ynë po përpiqet të japë më shumë karburant për të siguruar që automjetet e përdorura nga vaksinuesit për të arritur tek fëmijët të mbeten funksionale dhe spitalet mund të rifurnizohen për të ruajtur shërbimet thelbësore,” tha shefi i OBSH-së.
“Ne bëjmë thirrje që të ruhen pauzat humanitare dhe të respektohet siguria e punonjësve shëndetësorë. Fëmijët në Gaza meritojnë paqe të qëndrueshme, jo vetëm vaksinat kundër poliomielitit.”
Izraeli ka vrarë më shumë se 41,000 palestinezë në Gaza që nga inkursioni i Hamasit të tetorit të kaluar. Veprimet kanë çuar në uri, zhvendosje masive dhe sëmundje në enklavën e bllokuar. Negociatat për t’i dhënë fund luftës vazhdojnë përmes ndërmjetësve të SHBA-së, Katarit dhe Egjiptit, por pa rezultat.
