Përshtati lokalin për shitjen droge, arrestohet 35-vjeçari në Vlorë

Një 35-vjeçar ka rënë në pranga nga efektivët e policisë në Vlorë. Sipas komunikatës zyrtare, policia ka sekuestruar 180 doza kanabisi dhe një shumë parash, që u gjetën në lokal.

Teksa i riu do të përballet me akuzat, materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.

Njoftimi i policisë: 

DVP Vlorë/Vijon megaoperacioni policor antidrogë i koduar “Tempulli”.

Përshtati ambientet e lokalit, për shitjen e dozave të kanabisit, arrestohet 35-vjeçari.

Sekuestrohen 180 doza kanabisi dhe një shumë parash, që u gjetën në lokal.

Si rezultat i administrimit të menjëhershëm të informacioneve të siguruara nga inteligjenca policore, në kuadër të megaoperacionit “Tempulli”, për një shtetas që shiste doza të lëndëve narkotike në një lokal në Vlorë, Komisariati i Policisë Vlorë në bashkëpunim me Seksionin për Hetimin e Narkotikëve i DVP Vlorë, finalizoi operacionin policor të koduar “Parts 33”.

Gjatë operacionit u arrestua në flagrancë shtetasi K. J., 35 vjeç, banues në Vlorë.

Nga kontrolli në lokalin në pronësi të shtetasit K. J., shërbimet e Policisë gjetën dhe sekuestruan në cilësinë e provës materiale 180 doza të lëndës narkotike kanabis, gati për shitje, dhe një shumë parash (40 900 lekë dhe 80 euro), të dyshuara të përfituara nga kjo veprimtari kriminale.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.