Me mbështetjen e ICITAP (International Criminal Investigative Training Assistence Program) nisi trajnimi i Oficerëve të Policisë Gjyqësore të Agjencisë së Mbikëqyrjes Policore (AMP) dhe të Policisë së Shtetit. Objekti i këtij trajnimi është hetimi i krimeve, sipas një moduli të standardizuar bashkëkohor dhe i miratuar tashmë nga Prokurori i Përgjithshëm.
Ministri i Brendshëm, Ervin Hoxha, në fjalën e tij përshëndetëse në fillim të këtij trajnimi, theksoi mbështetjen e plotë për AMP-në dhe çdo institucion tjetër të varësisë, që do t’i nënshtrohen një procesi efektiv reformimi.
“Agjencia e Mbikëqyrjes Policore do të ketë mbështetjen time më të fortë, duke rritur dhe forcuar më tej hetimet proaktive në luftë kundër korrupsionit në radhët e Policisë së Shtetit”, tha ministri Hoxha.
Sipas tij, “për të pasur një reformë të suksesshme, ndër të tjera kemi nevojë që AMP të jetë sa më dinamike në ushtrimin e funksioneve dhe detyrave të saj. Që të arrihen objektivat tona, duhet që punonjësit e AMP të kenë përgatitjen e duhur profesionale, integritetin dhe personalitetin e duhur”.
Fjala e ministrit Hoxha:
I nderuar z. Deasy,
I nderuar z. Sulejmani,
Në fakt është një kënaqësi për mua të jem këtu, në këtë ceremoni hapjeje të kursit për hetimet kriminale. Ky trajnim vjen në një kohë shumë të rëndësishme për zhvillimin dhe formimin e kapaciteteve të strukturave të Agjencisë së Mbikëqyrjes Policore (AMP) në tërësinë e forcimit dhe konsolidimit të institucioneve shqiptare.
Moduli i standardizuar, i hartuar nga specialistët më të mirë të ICITAP, i cili në miratim me Prokurorin e Përgjithshëm, do të jetë një udhërrëfyes shumë i qartë për veprimet procedurale të punonjësve të AMP-së të të tri roleve, por edhe të punonjësve të Policisë së Shtetit.
E vlerësoj këtë iniciativë të domosdoshme, jo vetëm se synon të përmirësojë aftësitë tona në fushën e sigurisë, por është edhe një shenjë shumë e fortë e angazhimit të vazhdueshëm të ICITAP dhe ekspertëve të tij, për të mbështetur Shqipërinë në përpjekjet e saj për forcimin e institucioneve ligjzbatuese.
Jam i bindur se ky trajnim ofron një mundësi dhe një perspektivë shumë të madhe për të gjithë punonjësit e Agjencisë së Mbikëqyrjes Policore, po ashtu është edhe një pjesë e pandashme për të përmirësuar dhe kapërcyer çdo vështirësi, duke rritur kapacitetet e aftësive të kësaj agjencie në fushat e drejtimit përkatës, për të kontribuar për një sistem të të fortë të rendit dhe ligjit.
Agjencia e Mbikëqyrjes Policore do të ketë mbështetjen time më të fortë, duke rritur dhe forcuar më tej hetimet proaktive në luftë kundër korrupsionit në radhët e Policisë së Shtetit.
Gjej rastin të falënderoj personalisht misionin ICITAP dhe dy ekspertët, të cilët kanë hartuar me një angazhim maksimal dhe arritën të përcjellin njohuritë e tyre për këtë modul trajnimi. Suksese në këtë përvojë dhe u uroj gjithë pjesëmarrësve ta shijojnë këtë modul, duke u shkëputur sadopak nga puna e përditshme.
Faleminderit!
Discussion about this post