Në fjalimin e tij në Florida, Donald Trump ku mbajti fjalimin e fitores, foli edhe në lidhje me atentatin që i ndodhi në korrik, ku një plumb e goditi në vesh. Ai iu drejtua mbështetësve duke u shprehur se ka një arsye se përse arriti t’i shpëtonte tentativës për ta eliminuar.
“Zoti ma fali jetën për një arsye. Dhe kjo arsye ishte për të shpëtuar vendin tonë dhe për të rikthyer Amerikën në madhështinë e saj. Tani ne do ta përmbushim atë mision së bashku. Detyra para nesh nuk do të jetë e lehtë, por unë do të sjell çdo grimcë energjie, shpirti dhe lufte që kam në shpirt në punën që më keni besuar”, tha ai.
Ai ceku edhe pjesën e luftërave, një shqetësim i konsiderueshëm sot në botë, ndërsa u shpreh se nuk SHBA nuk do të nisë luftëra, përkundrazi do t’u japë fund atyre. “Nuk do të nis luftëra, unë do t’i ndaloj luftërat. Ne nuk kemi nisur ndonjë luftë, përveç asaj me ISIS-n”, tha ai. Trump ka shpallur fitoren, por ende nuk ka arritur numrin e kërkuar të votave të Kolegjit Zgjedhor.
