I mituri me monopatinë përplaset me makinën dhe përfudon në spital. Referohen në Prokurori dhe dy vepra penale për…

Policia Rrugore në Vlorë njofton për aksidentet rrugore të ndodhura në orët e fundit në qarkun jugor.

Sipas Policisë Rrugore, ditën e djeshme, një 15-vjeçar duke drejtuar një monopatinë, është përplasur me një mjet dhe për pasojë është dëmtuar.

“Më datë 16.11.2024, në rrugën “Idriz Alidhima”, Sarandë, një shtetas i mitur 15 vjeç, duke drejtuar një monopatinë elektrike, është përplasur me automjetin tip “Peugeot” të parkuar dhe si pasojë është dëmtuar. Aktualisht, 15-vjeçari ndodhet në Spitalin e Sarandës, jashtë rrezikut për jetën”, tha Policia Rrugore Vlorë.

Ndërsa, janë referuar në prokurori dy vepra penale për një shofer në Vlorë, që ka përplasur një 67-vjeçar dhe më pas është larguar nga vendi i aksidentit.

“Sektori i Policisë Rrugore në DVP Vlorë referoi materiale në Prokurori për veprat penale “Largimi nga vendi i aksidentit” dhe “Shkelja e rregullave të qarkullimit rrugor,” pasi më datë 16.11.2024, në rrugën “Demokracia”, shtetasi G. H., 67 vjeç, duke drejtuar biçikletën, është aksidentuar nga një automjet, drejtuesi i të cilit është larguar nga vendi i ngjarjes. 67-vjeçari aktualisht ndodhet në spitalin e Vlorës, jashtë rrezikut për jetën. Vijon puna për identifikimin dhe kapjen e drejtuesit të automjetit”, njofton Policia Rrugore e qytetit bregdetar.