Gjykata e Fierit sekuestron mbi 1 mln euro pasuri të dyshuara si të ardhura nga krimi.
Këto pasuri i përkasin Nikolin Gjolenës, i cilësuar nga SPAK edhe si financuesi i organizatës së narkotrafikut, që po ngrinte laboratorin e kokainës në Frakull të Fierit.
Gjolena mori 12 vite burgim nga procesi në GJKKO në 25 Qershor 2024. Në total për 11 anëtarët e organizatës u dhanë 89 vite burgim nga Gjykata e Posaçme. Me 10 vite u dënua edhe ish-kryekomunari i Frakullës, Viktor Çervanaku.
Sipas dosjes hetimore dhe përgjimeve të realizuara dhe zbardhura për operacionin e vitit 2022, Nikolin Gjolena konsiderohej edhe si financues i blerjes së lëndës narkotike. Madje komunikonte edhe me një oficer policie, duke i dërguar kontaktin.
Komunikimet realizoheshin me kode dhe sipas SPAK, Gjolena komunikonte me efektivin dhe ky më tej me ish-kryekomunarin e Frakullës, Viktor Çervanaku. Në dosje janë të përfshirë edhe shtetas kolumbianë, që do bënin kimistin për të ekstraktuar kokainën nga plehu kimik ku ishte kamufluar.
Droga ishte vendosur prej muajsh në portin e Tivarit, derisa organizata në fjalë mori përsipër 24 tonë pleh kimik, të përzierë me 430 kilogramë kokainë. Operacioni u drejtua nga DEA amerikane, që e kishte ndjekur anijen që nga nisja në Amerikën e Jugut dhe deri në mbërritjen në Malin e Zi, me dorëzim të kontrolluar.
Discussion about this post