Ambasadori gjerman në Mbretërinë e Bashkuar thotë se Elon Musk duhet t’ju përgjigjet pyetjeve se pse kompania e tij, “X”, nuk ndërmori veprime pas aktivitetit online të autorit të dyshuar të sulmit tragjik në Magdeburg. Taleb postonte vazhdimisht postime anti-islamike, teori konspirative dhe kërcënime në platformë, raportojnë mediat e huaja.
Ambasadori Miguel Berge tha se Akti i Sigurisë Dixhitale i BE-së kërkon që kompanitë e mediave sociale të veprojnë, por kjo nuk ndodhi. Ai tha se i dyshuari ishte jashtëzakonisht aktiv, duke kërcënuar në platformën sociale “X”.
“Pyetja është, a vepron X vërtet kundër këtyre gjërave? Ne kemi një Akt të Sigurisë Dixhitale në Bashkimin Evropian i cili kërkon që mediat sociale të veprojnë… Kjo nuk ka ndodhur.”, është shprehur ai. Diplomati gjerman komentoi edhe thirrjet e Elon Musk ndaj kancelarit gjerman Olaf Scholz që të jepte dorëheqjen pas sulmit.
“Unë mendoj se Elon Musk, përpara se të japë këshilla të padëshiruara për qytetarët gjermanë, ai duhet të shikojë përgjegjësinë e platformës së tij,” tha ambasadori, duke vënë në dukje mbështetjen e Musk për Alternativën për Gjermaninë e ekstremit të djathtë.
Ndërkohë edhe Arabia Saudite paralajmëroi autoritetet gjermane për të dyshuarin pasi ai postoi pikëpamjet ekstremiste në llogarinë e tij personale “X”. Këto paralajmërime janë dhënë disa herë që kur ai u largua nga Arabia Saudite në vitin 2006, tha burimi për mediat e huaja, pa hyrë në detaje të mëtejshme.
Një vlerësim i rrezikut i kryer vitin e kaluar nga hetuesit penalë shtetërorë dhe federalë gjermanë arriti në përfundimin se njeriu nuk përbënte asnjë rrezik specifik, raportoi gazeta Welt, duke cituar burime të sigurisë gjermane.
Discussion about this post