Sulmi me dron në Kazan, Putin kërcënon sërish Ukrainën: Do përballen me shkatërrime më të mëdha ata që përpiqen të shkatërrojnë diçka në vendin tonë

Presidenti rus Vladimir Putin u zotua sot për më shumë “shkatërrime” në Ukrainë pas një sulmi me dron të shtunën, për të cilin Moska fajësoi Kievin, mbi ndërtesat në Kazan, një qytet në Rusinë qendrore.

Sulmi kishte në shënjestër ndërtesat e banimit pa shkaktuar viktima, sipas autoriteteve lokale.

Imazhet dramatike të publikuara në mediat sociale ruse tregojnë dronët që godasin ndërtesat e larta prej xhami.

Ukraina nuk ka komentuar mbi sulmin, as mbi akuzat ruse.

Kievi ka filluar rregullisht sulme brenda Rusisë, shpesh kundër objektivave të naftës ose industriale, në përgjigje të sulmeve ajrore ruse dhe sulmit të Kremlinit në tokën ukrainase gati tre vjet më parë.

Në javët e fundit, Vladimir Putin ka kërcënuar disa herë se do të godasë qendrën e Kievit me raketën e tij të re dhe të fuqishme “Oreshnik”, e cila u përdor për herë të parë në nëntor.

Sulmet ajrore thuajse të vazhdueshme nga ushtria ruse kanë gjunjëzuar sistemin energjetik të Ukrainës, me vendin që përballet me ndërprerje të rregullta elektrike në dimër.

Në front, ushtria ruse po përparon me shpejtësi, kryesisht në rajonin lindor të Donetskut, pika e nxehtë e luftimeve.

Trupat ruse pushtuan fshatrat Lozova, në rajonin e Kharkiv, dhe Sonchivka, pranë qytetit industrial të Kurakhove në rajonin e Donetsk, siç njoftoi sot Ministria ruse e Mbrojtjes.

Sonchivka është afër Kurakhove, i cili është pothuajse i rrethuar nga ushtria ruse dhe është një nga zonat kritike të luftimeve.

Rusia ka përshpejtuar përparimin e saj në Ukrainën lindore gjatë dy muajve të fundit, duke kërkuar të fitojë sa më shumë terren që të jetë e mundur përpara se presidenti i zgjedhur i SHBA-së, Donald Trump të marrë detyrën në janar.

Udhëheqësi republikan ka premtuar t’i japë fund luftës shpejt pa shpjeguar kurrë se si planifikon ta bëjë këtë.

Pasiguria rreth këtij plani po shkakton shqetësim në Ukrainë, e cila, duke pasur parasysh vështirësitë e saj në frontin ushtarak, ka frikë se do të detyrohet të pranojë një marrëveshje të pafavorshme.

Trupat ruse thonë se kanë kapur më shumë se 190 vendbanime ukrainase këtë vit. Kundër tyre, Kievi përpiqet të rezistojë pavarësisht mungesës së njerëzve dhe municioneve.