Prokuroria e Posaçme ka vendosur të shtyjë edhe për tre muaj të tjerë hetimet ndaj ish-zëvendëskryeministrit Arben Ahmetaj, i cili ndodhet në arrati që prej korrikut të vitit 2023.
Vendimi i është komunikuar avokatit të Ahmetajt, duke shtyrë afatin e hetimeve deri në mars të vitit 2025. Ky muaj shënon afatin e fundit për Prokurorinë e Posaçme për të dorëzuar dosjen në GJKKO, e cila do të vendosë më pas nëse dosja do të kalojë për gjykim apo jo.
I njëjti vendim është marrë edhe për familjarët e tij, përfshirë bashkëjetuesen dhe ish-bashkëshorten e ish-ministrit të Financave.
Arben Ahmetaj akuzohet për tre vepra penale: “Pastrim parash”, “Fshehje të pasurisë” dhe “Korrupsion pasiv”.
Në korrik të vitit 2023, Prokuroria lëshoi një urdhër arresti ndaj Ahmetajt dhe e shpalli atë në kërkim ndërkombëtar. Në mars të vitit 2024, akuzat i janë komunikuar përmes avokatit të tij ligjor.
Ahmetaj dyshohet se gjatë funksionit të tij si ministër ka marrë vendime për të mundësuar lidhjen e kontratave koncesionare nga sipërmarrës të ndryshëm.
Ndaj tij është duke u zhvilluar edhe një hetim pasuror, dhe deri më tani janë vënë nën sekuestro dy vila, disa apartamente dhe disa llogari bankare.
Discussion about this post