Kryetari i Partisë Demokratike, Sali Berisha ka publikuar biletën e avionit të kryetarit të Bashkisë së Tiranës, Erion Veliaj, i cili prej disa ditësh ndodhet në Shtetet e Bashkuara të Amerikës. Berisha thotë se Veliaj e ka biletën e kthimit më 18 janar, ndërsa hedh akuza ndaj tij, thekson se “po e mbush komunitetin ndërkombëtar me shpifje për të marrë azil”.
“Ligësia e tij ekstreme është se ai po mbush komunitetin ndërkombëtar se po persekutohem nga Sali Berisha, e tëra kjo vetëm e vetëm që të marrë statusin e azilantit politik”, tha Sali Berisha në konferencën me gazetarët.
Deklaratat e Sali Berishës u bënë pas replikave në distancë me kryetarin e Bashkisë, Erion Veliaj, i cili në një reagim të dy ditëve më parë (28 dhjetor) tha “nuk jam non grata o fundërrinë e historisë”.
“O Sali, o kërmë, që paske dhënë lajmin se jam arratisur nga Shqipëria, meqë ndonjë nga çimkat e tua më paska parë në avion. Po shkoj në Amerikë, për takime që i kam lënë prej kohësh, se jam kryetari i Bashkisë së Tiranës, dhe nuk jam Non Grata, o fundërrinë e historisë, që u bërë stërgjysh dhe sa më shumë zhubravitesh në atë surratin e lig, aq më shumë qelb Tiranën me gojën tënde”, shkruai kryebashkiaku i Tiranës më 28 dhjetor.
Discussion about this post