Celibashi thirrje shtetasve shqiptarë në diasporë: Regjistrohuni për zgjedhjet e 11 majit

Komisioneri Shtetëror i Zgjedhjeve, Ilirjan Celibashi u bëri thirrje sot shtetasve shqiptarë që jetojnë jashtë që të regjistrohen për zgjedhjet parlamentare të 11 majit.

“Regjistrohu sa më shpejt dhe sigurohu që zëri yt të dëgjohet më 11 maj”, bëri thirrje Celibashi, teksa theksoi se po vijon me intensitet regjistrimi për të gjithë zgjedhësit me qëndrim jashtë Shqipërisë.

Shtetasit shqiptarë mund të votojnë për deputetët e Kuvendit të Shqipërisë, nga shteti ku kanë vendqëndrimin.

“Regjistrimi është i detyrueshëm për të gjithë ata që duan të votojnë nga jashtë”, theksoi Celibashi.

Për t’u regjistruar qytetarët duhet të shkarkojnë aplikacionin e KQZ për Android dhe IOS, ose të vizitojnë www.kqz.gov.al (rubrika Votues nga Jashtë) për të marrë të gjitha informacionet se si mund të votojnë nga jashtë territorit të Shqipërisë për zgjedhjet për Kuvendin e Shqipërisë 2025.