Toga e Parë e EOD ka detyrë pastrimin e vendit nga municionet, për të siguruar jetën e njerëzve në çdo cep të Shqipërisë. Ministri i Mbrojtjes, Pirro Vengu ndau sot shembullin e tetar Andi Kadiut, një nga ushtarakët e Togës së Parë EOD, i cili është vetëm një nga djemtë dhe vajzat e kësaj strukture, e cila ka në thelb përkushtimin për të ndihmuar komunitetet e rrezikuara nga municionet e nëntokës.
Vengu theksoi se, modernizimi i pajisjeve dhe investimi i vazhdueshëm në kapacitete njerëzore e kanë transformuar këtë togë në një nga më të rëndësishmet e Forcave të Armatosura. Vengu u shpreh krenar për djemtë dhe vajzat e përkushtuar në punën dhe misionin e pastrimit të vendit nga municionet e rrezikshme. Tetar Andi Kadiu tregon disa nga pajisjet që kjo togë përdor për të kryer detyrat e saj.
“Detyra jonë më kryesore është pastrimi i municioneve të mbetura nga luftërat e mëparshme ose dhe nga konfliktet që ne kemi pasur brenda vendit tonë”, tha Kadiu. “Kemi dhe kostumin e rëndë, robotin. Këto na ndihmojnë shumë në kërkimin dhe zbulimin e pajisjeve shpërthyese që ne të jemi më të sigurt dhe ta bëjmë jetën e qytetarëve sa më të sigurt”, u shpreh ai.
Kadiu tregoi një nga rastet që mban mend në 15 vite pune dhe disa vite në kompaninë EOD ka qenë rasti i gjetjes së një bombe amerikane në ndërtimin e një pallati të ri, tek fusha e helikopterëve.
“Ishte një rast interesant sepse bomba mund të kishte disa vite aty, por ishte në gjendje sikur ishte hedhur sot dhe ishte akoma rrezikshmëri shumë e madhe për banorët e asaj zone. Falë punës të të gjithë neve dhe kolegëve tanë dhe falë pajisjeve që kemi ne bëmë kërkimet tona dhe zbuluam mënyrën sesi ta bëjmë të sigurt atë bombë dhe transportimin e saj drejt një vendi të sigurt dhe pasjen e sigurisë së zonës”, tha tetar Andi Kadiu.
