Ritmi i pushtimeve territoriale ruse në Ukrainë po ngadalësohet këtë fillimvit, pasi ushtarët e Koresë së Veriut po tërhiqen përkohësisht nga rajoni i Kurskut për shkak të humbjeve të rënda të pësuar deri më tani, sipas Ministrisë britanike të Mbrojtjes dhe bazuar në informacionet e shërbimeve sekrete.
”Në janar, forcat ruse pushtuan rreth 320 kilometra katrorë të territorit ukrainas, 20 për qind më pak nga rreth 400 kilometra katrorë në dhjetor 2024”, sipas një deklarate të botuar në X. Muajin e kaluar, ushtarët e Moskës kapën bastionin e Velyka Novoselkas, por përparimi i tyre përgjatë pjesës më të madhe të vijës së frontit ka qenë relativisht i kufizuar.
Megjithatë, gjatë vitit 2024, Rusia ka përshpejtuar përparimin e saj, me mbi 700 kilometra katrorë territor të pushtuar vetëm në muajin nëntor, një nga hapat më të shpejtë të ofensivës që nga fillimi i luftës. ”I njëjti skenar po ndodh në rajonin rus të Kurskut, ku forcat e Moskës kanë bërë vetëm përparim të lehtë në janar”, shtoi ministria.
Në të njëjtën kohë, forcat koreano-veriore, siç e kishin zbuluar tashmë vlerësimet e shërbimeve sekrete koreano-jugore, janë tërhequr përkohësisht nga linjat e frontit, me sa duket për të pushuar dhe ripajisur përpara një dislokimi të ri. “Kjo është pothuajse me siguri për shkak të humbjeve të rënda të pësuar gjatë sulmeve ndaj pozicioneve të kontrolluara nga ukrainasit”, vuri në dukje ministria.
Discussion about this post