Lidhja Demokratike e Kosovës (LDK) ka prezantuar rezultatet e exit poll-it më të madh të realizuar ndonjëherë në Kosovë, duke anketuar 18 mijë respondentë në të gjithë vendin.
Sipas këtij sondazhi, Lëvizja Vetëvendosje (VV) prin me 34% të votave, ndërsa LDK ka arritur në 24%, e ndjekur nga Partia Demokratike e Kosovës (PDK) me 22%.
Zëdhënësi i LDK-së, Besian Mustafa, tha gjatë një konference për media pas mbylljes së vendvotimeve se rezultatet paraprake të mbledhura nga komisionerët në terren përkojnë me të dhënat e publikuara nga ky exit poll.
“Dua të falënderoj të gjithë ata që i kanë dhënë besimin LDK-së përmes votës se tyre. Të dhënat peliminare që na vijnë nga komisionerët tanë në teren, tregojnë që ato përkojnë me të dhënat që kemi publikuar nga exit poll-i i LDK-së.” – tha ai.
Ai theksoi se krahasuar me zgjedhjet e kaluara, LDK ka shënuar një rritje të ndjeshme në përkrahje, duke dyfishuar rezultatin e saj.
Sipas tij, ky rezultat pritet të rritet me “së paku 2 deri në 3 pikë të përqindjes” me numërimin e votave të diasporës.
“Exit Polli më i madh që është realizuar ndonjëherë në Kosovë me 18 mijë respodentë ku rezulton që VV-ja ka 34 për qind, LDK-ja 24 për qind, ndërsa PDK 22 për qind. Pra ajo që është e rëndësishme të theksohet është që LDK ka së paku dyfishim nga rezultati i zgjedhjeve të kaluara pa llogaritur këtu dhe votat që do të vijnë nga diaspora ku ne presim një rezultat të shkëlqyeshëm që do të rrit rezultatin e LDK-së së paku 2 deri në 3 pikë të përqindjes.” – tha Mustafa.
Discussion about this post