Ministrja e Shëndetësisë dhe Mbrojtjes Sociale, Albana Koçiu ndau sot lajmin e mirë për fëmijët me humbje të dëgjimit, ndërsa thotë se në shërbimin e Otorinolaringologjisë në Qendrës Spitalore Universitare “Nënë Tereza” pranë spitalit francez, po “vijon me sukses programi i implantit koklear, një procedurë që ka ndryshuar jetën e dhjetëra fëmijëve përgjatë këtyre katër viteve”.
“Vendosja e implantit koklear vazhdon me programimin e aparaturës që së bashku me terapinë e logopedisë, që i ndihmon fëmijët jo vetëm të dëgjojnë, por edhe të mësojnë të flasin”, thotë Koçiu.
Ministrja e Shëndetësisë dhe Mbrojtjes Sociale shprehet se “për fëmijët që nuk përfitojnë nga aparatet e zakonshme të dëgjimit, ky implant është shpresa për një jetë të integruar, duke u dhënë mundësinë për një zhvillim të plotë”.
Ministrja Koçiu u ka shprehur mirënjohje ekipit të mjekëve, Prof. Birkena Qirjazi, Dr. Arbër Gjermeni (Anestezist), Prof. Suela Sallavaci dhe infermierët, Monika Kita, Flutura Hyseni, Stela Mine, Teuta Duravaku, Marsel Muço.
“Implanti koklear është një pajisje që vendoset nëpërmjet operacionit për t’iu mundësuar njerëzve që nuk dëgjojnë të dëgjojnë përsëri. Shërbimi i ORL-së ka disa vite që kryen këtë lloj operacioni për fëmijët të cilët kanë humbje të mëdha dëgjimi duke ju mundësuar jo vetëm që të dëgjojnë, por që të zhvillojnë edhe gjuhën e folur. Tashmë, ky operacion që nuk kryhej më përpara në Shqipëri është i mundur edhe për fëmijët shqiptarë”, thotë Birkena Qirjazi, shefja e repartit të ORL-së pranë QSUNT-së.
Discussion about this post