Shqipëria do të presë për herë të parë nisjen e madhe të ”Giro d’Italia” (”Giro d’Italia Grande Partenza”), një nga turnetë më të famshëm çiklistik në botë. Turi çiklisti do të nisë nga Durrësi në 9 maj për të vijuar më pas në Tiranë (10 maj) dhe Vlorë (11 maj).
Kryeministri Edi Rama nënvizoi sot rëndësinë e këtij eventi, ku marrin pjesë 180 çiklistë profesionistë. “Për herë të parë në histori… Giro d’Italia vjen në Shqipëri. Një nga ngjarjet më të mëdha të çiklizmit botëror do të zhvillohet në datat 9, 10 dhe 11 Maj në Durrës, Tiranë dhe Vlorë”, u shpreh Rama.
Kryeministri bëri të ditur se 180 çiklistë profesionistë, kampionë nga e gjithë bota, do të garojnë në rrugët tona, duke e vendosur Shqipërinë në hartën e sportit dhe emocioneve globale. ”Giro d’Italia” lind në vitin 1909 së bashku me ”Gazzetta dello Sport” dhe është një nga garat më të rëndësishme çiklistike botërore, e cila transmetohet nga media të rëndësishme botërore.
Në 114 vite histori të garës, ”Giro d’Italia Grande Partenza” është zhvendosur jashtë kufijve italianë vetëm 14 herë.
