Gjuha denigruese në garën zgjedhore, Celibashi me tone humori: Ata nuk dëgjojnë, votuesit japin gjykimin për çdo fushatë

Kreu i KQZ, Ilirjan Celibashi ka zhvilluar sot një konferencë me gazetarët në kuadër të zhvillimeve të fushatës elektorale për zgjedhjet e 11 majit.

Kryekomisioneri i zgjedhjeve u pyet dhe për gjuhën e përdorur nga partitë politike dhe krerët e tyre gjatë fushatës, që herë pas here është cilësuar edhe si “denigruese”.

Ai theksoi se KQZ nuk mund të bëjë më shumë se sa ka bërë në lidhje me këtë problematikë, ndërsa shtoi se edhe në shembujt e vendeve perëndimore u takon zgjedhësve që të japin gjykimin e tyre për çdo fushatë.

“Të them që ata nuk dëgjojnë… KQZ nuk mund të bëjë më shumë se sa kemi bërë apo sa kemi thënë në lidhje me këtë çështje. Në eksperienca të tilla të ngjashme dhe në vendet perëndimore janë votuesit ata që japin gjykimin për çdo mënyrë të bërjes së fushatës elektorale për të kuptuar nëse ka qenë e përshtatshme apo jo gjuha apo ajo që është bërë nga partitë”, tha Celibashi.