Tiranë, 17 maj 2025 – Presidenti i Republikës së Shqipërisë, Sh.T.Z. Bajram Begaj, priti sot në një takim zyrtar Presidenten e Republikës së Moldavisë, Sh.S.Znj. Maia Sandu. Në këtë takim, Presidenti Begaj e uroi homologen moldave për rizgjedhjen në detyrë, duke i shprehur urimet më të përzemërta në emër të popullit shqiptar.
Presidenti Begaj rikonfirmoi mbështetjen e palëkundur të Shqipërisë për popullin e Moldavisë, i cili po përballon sfida të mëdha në rrugën drejt demokracisë, begatisë dhe integrimit evropian, në një kohë të tensionuar për shkak të agresionit rus ndaj Ukrainës.
Në fjalën e tij, Kreu i Shtetit vlerësoi marrëdhëniet e mira ndërmjet Shqipërisë dhe Moldavisë, duke theksuar rëndësinë e thellimit të dialogut politik dhe nxitjes së shkëmbimeve të ndërsjella në nivele të larta.
Gjithashtu, Presidenti Begaj shprehu interes për forcimin e mëtejshëm të marrëdhënieve dypalëshe, me fokus në zhvillimin e bashkëpunimit ekonomik, promovimin e turizmit dhe thellimin e lidhjeve kulturore mes dy vendeve.
