Sekretari i Mbrojtjes, Pete Hegseth, ka pranuar një avion Boeing 747 nga Katari që pritet të përdoret edhe nga Presidenti i SHBA-ve, Donald Trump.
Fillimisht Pentagoni duhet që ta modifikojë atë për të përfshirë “masat e duhura sigurie”, sipas një zëdhënësi të Departamentit të Mbrojtjes.
“Sekretari i Mbrojtjes ka pranuar një Boeing 747 nga Katari në përputhje me të gjitha rregulloret federale. Departamenti i Mbrojtjes do të punojë për të siguruar që masat e duhura të sigurisë dhe kërkesat e misionit funksional të merren në konsideratë për një avion të përdorur për të transportuar presidentin e Shteteve të Bashkuara”, tha zëdhënësi i Pentagonit, Sean Parnell, në një deklaratë të mërkurën.
Megjithatë, një person i njohur me diskutimet kundërshtoi duke thënë se marrëveshja nuk është finalizuar ende dhe se bisedimet midis ekipeve ligjore janë duke vazhduar.
Ndërkohë kujtojmë se të hënën kryeministri i Katarit tha për mediat e huaja se “historia e aeroplanit është një transaksion i Ministrisë së Mbrojtjes me Departamentin e Mbrojtjes që është bërë në transparencë të plotë dhe shumë ligjërisht, dhe është pjesë e bashkëpunimit që kemi bërë gjithmonë së bashku për dekada të tëra”.
