Enis Vrapi, 42 vjeç, është arrestuar nga Policia e Shtetit pas një incidenti të rëndë të ndodhur paraditen e së premtes, më 23 maj, në ambientet e Qendrës Spitalore Universitare “Nënë Tereza” (QSUT) në Tiranë. Sipas njoftimit zyrtar, Vrapi ka qëlluar me një pistoletë lodër (me gogla) në drejtim të një mjekeje në QSUT dhe më pas është larguar me makinë, duke përplasur tre automjete të policisë gjatë tentativës për t’u arratisur. Si pasojë e përplasjes, dy punonjës të policisë rrugore kanë pësuar dëmtime të lehta.
Policia njofton se gjatë ndalimit, 42-vjeçari ka kundërshtuar me dhunë edhe një punonjës të Shërbimit Privat të Sigurisë Fizike (SHPSF).
Gjatë kontrollit të mëvonshëm në banesën dhe automjetin e tij, forcat e rendit sekuestruan sasi municioni për armë zjarri, një armë gjahu, armë të ftohta si dhe pjesë përbërëse armësh.
Specialistët për Hetimin e Krimeve pranë Komisariatit të Policisë Nr. 4 po vijojnë hetimet për zbardhjen e plotë të rrethanave të ngjarjes dhe për përcaktimin e përgjegjësive ligjore.
Njoftimi:
Specialistët për Hetimin e Krimeve të Komisariatit të Policisë Nr. 4:
-arrestuan shtetasin E. V., 42 vjeç, pasi ditën e djeshme, ka rrezikuar jetën e punonjësve të Policisë, duke përplasuar 3 automjetet e tyre, me automjetin që drejtonte, ku si pasojë, u dëmtuan lehtë 2 punonjës policie të qarkullimit rrugor, ka qëlluar me pistoletë lodër një mjeke të QSUT-së, si dhe ka kundërshtuar me dhunë një punonjës SHPSF. Gjatë kontrollit të banesës dhe të automjetit të tij, iu gjetën sasi municioni për armë zjarri dhe armë gjahu, armë të ftohta dhe pjesë përbërëse arme.
