Këshilli Kombëtar Shqiptar ka reaguar për mospranimin e asnjë shqiptari në radhët e policisë serbe. Në një postim në Facebook kreu i këtij Këshilli Enkel Rexhepi shprehet se “në listën e fundit të publikuar nga Ministria e Punëve të Brendshme të Serbisë, nga 43 kandidatë të pranuar në konkursin për policë, nuk është pranuar asnjë shqiptar në Preshevë dhe Bujanoc. Po ashtu edhe në Medvegjë nga 22 polic, asnjë shqiptar”.
Kryetari i Këshillit Kombëtar Shqiptar (KKSH), Enkel Rexhepi, e ka cilësuar këtë si një sinjal alarmant dhe dëshmi të qartë të diskriminimit sistematik që po ushtrohet ndaj shqiptarëve nga institucionet shtetërore të Serbisë.
“Kjo situatë është një rikthim i qartë në vitin 2001, kur shqiptarët ishin tërësisht të përjashtuar nga strukturat shtetërore, përfshirë edhe policinë. Mospërfshirja e shqiptarëve nuk është vetëm padrejtësi, por shkelje e marrëveshjeve ndërkombëtare dhe një rrezik i drejtpërdrejtë për bashkëjetesën”, thuhet në postimin e kryetarit Rexhepi.
Ai kujtoi se pikërisht “24 vjet më parë u nënshkrua Marrëveshja e Konçulit, e cila parashikonte integrimin e shqiptarëve në jetën publike dhe krijimin e një policie multietnike në Luginën e Preshevës. Në vitet 2002–2004, u arrit një përfshirje e konsiderueshme e shqiptarëve në forcat policore, por që nga ajo kohë, procesi është ndalur tërësisht”.
KKSH paralajmëron se, “nëse ky trend vazhdon, me daljen në pension të kuadrove ekzistuese shqiptare dhe mungesën e pranimeve të reja, Luginës së Preshevës i kanoset një zbrazje e plotë e përfaqësimit shqiptar në polici”.
Këshilli ka bërë thirrje për rikthimin urgjent të programit të policisë multietnike, si e vetmja mënyrë për të garantuar përfaqësim të drejtë dhe proporcional në përputhje me kushtetutën, marrëveshjet ndërkombëtare dhe planin 7-pikësh për integrimin e shqiptarëve në institucionet shtetërore.
