Ministria e Mbrojtjes ka publikuar programin mediatik të stërvitjes ndërkombëtare DEFENDER 25, ku Shqipëria është një nga vendet pritëse të këtij angazhimi të rëndësishëm ushtarak të organizuar nga Shtetet e Bashkuara të Amerikës dhe aleatët e NATO-s.
Programi përfshin disa aktivitete të rëndësishme që do të ndjekin faza të ndryshme të stërvitjes në terren:
1. Më 27 maj, në orën 04:30, do të nisë lëvizja e trupave nga Zall-Herri drejt zonës së dislokimit në Bizë, ku do të zhvillohen ushtrime intensive ushtarake. Mediat e Ministrisë së Mbrojtjes do të realizojnë xhirime dhe foto nga ky moment. Pamjet do të shpërndahen në rrugë zyrtare nga Ministria.
2. Më 5 qershor, në orën 10:00, do të zhvillohet një incident stërvitor (operacion imbarkimi) në Portin e Durrësit. Ky aktivitet do të jetë i hapur për përfaqësuesit e mediave, pas përfundimit të procesit të akreditimit.
3. Më 7 qershor, në orën 10:00, në Bizë do të zhvillohet prova gjenerale e një prej skenarëve të stërvitjes, e hapur për ndjekje nga afër nga përfaqësuesit e akredituar të mediave.
Gjatë ndjekjes së këtyre aktiviteteve, gazetarët do të kenë mundësi të realizojnë intervista me ushtarakë pjesëmarrës, përfshirë ushtarë shqiptarë nga Shqipëria dhe Kosova, si dhe ushtarakë amerikanë me origjinë shqiptare që shërbejnë në Gardën Kombëtare të Nju Xhersit.
Procesi i akreditimit mediatik do të njoftohet 2 ditë përpara çdo eventi nga strukturat përkatëse të Ministrisë së Mbrojtjes.
