Një nga figurat më të kërkuara të krimit të organizuar shqiptar, Dritan Gjika, është arrestuar në Emiratet e Bashkuara Arabe, në një operacion të koordinuar ndërkombëtar mes Njësisë Kombëtare të Interpolit në Ekuador, autoriteteve në Abu Dabi, Spanjës, dhe me mbështetjen e programit PAcCTO 2.0.
Dritan Gjika, 47 vjeç, i njohur si lider i një organizate të fuqishme kriminale që vepronte në Ekuador dhe Spanjë, ishte në kërkim ndërkombëtar me dy njoftime të kuqe të Interpolit për veprat penale të trafikut të drogës, pastrimit të parave dhe krimit të organizuar.
Sipas të dhënave të autoriteteve të migracionit, Gjika ka hyrë për herë të parë në Ekuador në vitin 2009 me vizë të përkohshme turistike, për t’u bërë më pas një ndër krerët më të kërkuar të krimit të organizuar në vend.
Organizata që ai drejtonte ishte strukturuar në nivele të ndryshme: drejtues, logjistikë dhe bashkëpunëtorë që operonin përmes kompanive të ligjshme, me qëllim fshehjen e aktivitetit kriminal dhe pastrimin e të ardhurave. Hetimet kanë zbuluar se rrjeti kriminal përfshinte edhe punonjës portualë që ndihmonin në kontaminimin e kontejnerëve me lëndë narkotike, duke përdorur metodën e njohur si “grepi i verbër” (“gancho ciego”).
Në 6 shkurt 2024, pas një kontrolli në një banesë luksoze në Guayaquil, Prokuroria e Përgjithshme e Shtetit të Ekuadorit e identifikoi zyrtarisht.
