Administrata Trump ka filluar procesin formal për të revokuar të drejtën e Harvardit për të pritur studentë ndërkombëtarë, një veprim që duket se synon të shpërbëjë një padi që universiteti ngriti javën e kaluar për të kundërshtuar këtë veprim.
Avokatët e Departamentit të Drejtësisë informuan sot një gjykatës federal se Departamenti i Sigurisë Kombëtare i ka dërguar universitetit një “Njoftim për Qëllimin e Tërheqjes” nga Programi i Studentëve dhe Vizitorëve të Shkëmbimit (SEVP).
Njoftimi pesëfaqësh, i dorëzuar ndërsa Harvardi është në mes të ceremonisë së diplomimit, rendit disa arsye pse qeveria synon t’i revokojë Harvardit të drejtën për të pranuar studentë ndërkombëtarë – duke përfshirë akuzat se universiteti nuk ka përmbushur kërkesat e raportimit në lidhje me studentët ndërkombëtarë dhe nuk po arrin të mbajë një mjedis “të lirë nga dhuna dhe antisemitizmi” – dhe i jep universitetit 30 ditë kohë për t’u përgjigjur me deklarata me betim ose prova të tjera.
Avokatët e qeverisë dhe të Harvardit do të përballen sot në gjykatë në Boston për një mosmarrëveshje që avokatët e universitetit thonë se u iniciua pa ndjekur procedurat federale për çertifikimin nga sistemi SEVP.
Seanca dëgjimore para gjyqtares federale Allison Burroughs, e cila bllokoi urdhrin e Trump për viza më 22 maj, është planifikuar për në orën 10:30 të mëngjesit sipas kohës së Bostonit.
