Besa Shahini, ish-ministre e Arsimit në Shqipëri dhe anëtare e Partisë Socialdemokrate në Kosovë, ka shpallur zyrtarisht kandidaturën e saj për kryetare të Komunës së Prishtinës në zgjedhjet lokale që pritet të mbahen këtë vjeshtë.
Përmes një postimi në rrjetin social Facebook, Shahini deklaroi se vendimi i saj vjen si pjesë e një “përpjekjeje të re” për ndryshimin e drejtimit të zhvillimit të kryeqytetit, të cilin ajo e përshkroi si të dominuar nga betoni, i papastër dhe me mungesë të theksuar të hapësirave të gjelbërta.
“Para katër viteve jam kthyer të jetoj nga Tirana në një qytet që ka potencial të jashtëzakonshëm, por që ka marrë një kahje të gabuar në zhvillim e vet. Është një qytet krejtësisht i mbuluar me beton, pa hapësira të mjaftueshme të gjelbërta, kryesisht i papastër”, u shpreh Shahini në një videomesazh të publikuar bashkë me njoftimin.
Ajo bëri thirrje për një “ndryshim radikal” në mënyrën e menaxhimit të Prishtinës dhe ftoi qytetarët që t’i bashkohen kësaj përpjekjeje për transformim.
Shahini ka një përvojë të gjatë në fushën e arsimit dhe politikave publike, si në Shqipëri ashtu edhe në rajon. Ajo ka shërbyer si ministre dhe zëvendësministre në Ministrinë e Arsimit, Sportit dhe Rinisë në Republikën e Shqipërisë dhe është angazhuar për vite me radhë në kërkim dhe avokim në fushën e arsimit dhe integrimit evropian në Ballkanin Perëndimor dhe në Kaukazin Jugor.
