Me rastin e festës së Kurban Bajramit, Presidenti i Republikës, Bajram Begaj, ka përcjellë një urim të veçantë për të gjithë besimtarët myslimanë dhe qytetarët shqiptarë.
Përmes një mesazhi të publikuar në rrjetet sociale Facebook dhe X, Kreu i Shtetit thekson rëndësinë shpirtërore të kësaj dite për komunitetin mysliman, duke e cilësuar Kurban Bajramin si një festë të sakrificës së sinqertë dhe të besimit të palëkundur në Zot.
“Kurban Bajrami është dita në të cilën besimtarët myslimanë afrohen më pranë Zotit, është festa e ngadhënjimit të sakrificës së sinqertë dhe besimit në Zot.
Kurban Bajrami është dëshmi e pashtershme sesi sakrifica, durimi dhe dashuria i japin njerëzve paqen e tyre të brendshme dhe mposhtin egoizmin, urrejtjen dhe pangopësinë,” – shkruan Presidenti Begaj.
Në përfundim të mesazhit të tij, ai uroi nga zemra për më shumë mirësi dhe gëzim në familjet shqiptare:
“Uroj nga zemra të gjithë besimtarët myslimanë dhe të gjithë shqiptarët për më shumë mirësi dhe gëzime në familjet e tyre!
Gëzuar Kurban Bajramin dhe qofshi në mbrojtjen e Zotit!”
