Një raund i ri bisedimesh që synojnë zgjidhjen e një lufte tregtare midis SHBA-së dhe Kinës është planifikuar të zhvillohet në Londër sot. Presidenti i SHBA-së, Donald Trump, tha të premten se një delegacion i lartë amerikan do të takohet me përfaqësuesit kinezë.
Lajmi u konfirmua pasi Trump dhe udhëheqësi i Kinës Xi Jinping patën një bisedë telefonike javën e kaluar, të cilën presidenti amerikan e përshkroi si një “bisedë shumë të mirë”.
Muajin e kaluar, dy ekonomitë më të mëdha në botë ranë dakord për një ‘armëpushim’ të përkohshëm për të ulur taksat e importit për mallrat që tregtohen midis tyre, por që atëherë të dy vendet e kanë akuzuar njëri-tjetrin për shkelje të marrëveshjes.
Trump po ndjek që nga marrja e detyrës një kurs të ashpër në politikën tregtare ndaj Kinës. Republikani madje i rriti tarifat doganore ndëshkuese ndaj importeve kineze në SHBA deri në shifrën marramendëse prej 145 përqindësh, të cilave Pekini iu përgjigj me kundër-tarifa doganore.
