Seksioni për Hetimin e Narkotikëve në DVP Vlorë ka finalizuar me sukses operacionin antidrogë të koduar “Cocktail”, në kuadër të masave për garantimin e sigurisë në zonat turistike dhe goditjes së veprimtarisë kriminale të shpërndarjes së drogave të forta.
Si rezultat i operacionit u arrestuan në flagrancë dy shtetas britanikë:
-
J. B., 34 vjeç
-
J. C., 33 vjeç,
të dy lindur dhe banues në Londër, të cilët qëndronin të akomoduar në një dhomë në fshatin Dhërmi.
Gjatë kontrollit në dhomën e tyre dhe në automjetin tip “Mitsubishi”, në përdorim të tyre, policia sekuestroi:
-
52 doza MDMA
-
51 doza Ketaminë
-
120 kokrra Ekstazi
-
6 185 euro dhe 720 paundë, të dyshuara si të përfituara nga shitja e drogës
-
4 aparate celularë
Nga hetimet rezulton se këta shtetas i shpërndanin dozat e lëndëve narkotike në ambiente argëtimi përgjatë bregdetit, të frekuentuara nga turistë dhe pushues, duke rrezikuar seriozisht sigurinë publike.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme ligjore.
Policia e Shtetit thekson se kontrollet intensive në zonat turistike do të vijojnë pa ndërprerje për të garantuar një sezon veror të sigurt për qytetarët dhe vizitorët vendas e të huaj.
