Në një intervistë për Fax News, diplomati Spartak Topollaj komentoi krisjen e fundit mes presidentit amerikan Donald Trump dhe miliarderit Elon Musk, duke e quajtur një zhvillim të papritur, por të kuptueshëm, për shkak të protagonizmit të tepruar të Musk.
“E konsiderova një gjetje të mençur aleancën me njeriun më të pasur të botës, me Elon Musk. Njeriu më i fuqishëm i botës në kuptimin politik bëri mikun e tij më të ngushtë njeriun më të pasur të botës.”
Sipas Topollajt, marrëdhënia mes dy figurave të fuqishme ishte interesante, por gjithashtu e rrezikshme në natyrën e saj.
Ai theksoi se aleanca e tyre u konsumua shpejt për shkak të karaktereve të forta dhe mungesës së balancës në protagonizëm.
“Më ka lënë një shije të keqe delirizmi i tij (Musk). Ai donte të binte në sy. Bënte eksibicionistin.” – u shpreh Topollaj gjatë intervistës.
Topollaj u shpreh se Trump i ka ofruar Musk poste të rëndësishme në administratën e tij, duke treguar besim dhe përzgjedhje strategjike, por marrëdhënia nuk arriti të mbijetojë.
Sipas tij, nuk ishte Trump që gaboi i pari në këtë marrëdhënie.
“Trump e ka përzgjedhur Musk-un nga fusha më e pasur e botës, nuk e zgjodhi nga sporti ose arti. Ata e konsumuan njëri-tjetrin.”
Ndërsa krisja u bë më e thellë, akuzat nga ana e Musk ndaj Trump lidhur me përfshirjen në çështjen e famshme të Jeffrey Epstein shtuan tensionin. Musk ka akuzuar publikisht Trump për dijeni ose përfshirje në krimet e pedofilisë të lidhura me Epstein, të cilat kanë ngjallur shumë polemika dhe ka ngritur pikëpyetje për motivet e tij.
“Nëse ti ke pasur dijeni për këtë dosje, pse zgjodhe ta financosh administratën e tij?”- u shpreh Topollaj.
Topollaj nuk përjashton mundësinë e një pajtimi mes dy figurave, duke theksuar se heshtja e Trump mund të jetë një shenjë reflektimi, ndërsa Musk është tërhequr disi, duke shfaqur pendesë.
“Historia ka treguar që dy njerëz shumë të pushtetshëm mund të ecin paralelisht. Kushtetuta amerikane i jep fuqi të plotë presidentit. Unë shpresoj se mund të ketë një rregullator mes tyre.” – theksoi ai.
